Екстремни Тренинзи: Мантово – Струмица

На еден ден пред мојот роденден (Tomas Lobanga роден: 6ти Дек 1983) со Mazungo го реализиравме еден од моите најдраги тренинзи, кој секако е Ектремен Тренинг. Драг затоа што се одржа во Струмичкиот регион, од каде што (за тие што не знаете) јас потекнувам.
Поконкретно, тренингот започна во нешто пред 12 часот, од местото Мантово. Тоа е вештачко езеро кое се наоѓа десно од главниот магистрален пат кон Радовиш, помеѓу селата Ињево и Конче. Сред никаде има раскрсница каде патот се исклучува за село Долни Липовик. Старт 0,0км.
Патот не водеше низ Д. Липовик, па низ скоро бесконечен лавиринт од селски патчиња, реки, кал до колена и слично, до с. Рич. Checkpoint: точно половина (17,5км)
По убав пат, кој го заобиколува целото езеро Водоча (уште едно вештачко езеро, кое за локалните жители најверојатно служи за наводнување), следуваше село Белотино. Некаде на овој дел од патот забележавме дека сме изминале точно 21,1км (што е полумаратон) за 1h55min. Оваа информација е за нашите тркачки пријатели :)
Па следуваше и браната Водоча, за конечно да стигнеме и до село Попчево!
За оние што не знаат, Tomas Lobanga е всушност Томе Попчевалиев, и веќе може да забележите зошто овој тренинг ми е посебно драг. Пред многу многу генерации (стотина години), мојата фамилија пред да се пресели во Струмица, всушност живеела во овој предел, од каде очигледно потекнува и моето презиме.
Но да се навратиме на тркачкиот дел од тренингот.
Чувствувајќи се изненадувачки свежо по ~30км на трк го прошетавме Попчево и се упативме преку баиро (рид = баир :) ) кон Манастир Св. Илија. Тоа е едно мало манастирче скриено длабоко во шумите над Струмица. По 3 часа трчање не ни се застануваше, па нормално го поминавме за 7 секунди и за кратко време се симнавме во градот.

http://www.youtube.com/watch?feature=player_embedded&v=UM163C7HrnY

Ресторан “Бонита” беше наредна локација, и 20те ќебапчиња, 2те домашни кобасици, 2те полнети пилешки вешалици, помфрит, сирење, нафора, сокови, беа едвај доволни за да можеме барем на не-гладен стомак да фатиме пат за Скопје.