Очекувано: Кираџиеви меѓу победниците на Хронометар 10км!

Заради пандемијата и посебните протоколи за одржувањето на трката HalkEco Хронометар 10КМ, прогласувањето на победниците не се случи на денот на трката, туку истите беа прогласени денес, оналјн на фан страната на трката.

Како и што очекувавме со најавата во нашиот претходен пост – гужва од Кираџиеви на топ позициите.

Највисоко пласирана беше Биљана Кираџиева, која со нов личен рекорд се закити со сребрен медал во категорија кај дамите и неверојатен резултат од 38:26.

Александар Кираџиев, беше бронзен во машка категорија кој исто така истрча свој личен рекорд и патеката од 10км ја истрча за одлично време од 33:49!

Во женска категорија, меѓу освојувачките на награда се искачи Весна Кираџиева, која иако истрча резултат далеку послаб од нејзиниот личен  рекорд кој е и поранешен државен рекорд на Македонија, сепак оствари висок пласман како четврто пласирана.

Веројатно непотребно да објаснуваме зошто оттука медиумите милуваат да ги наречат и Running Royalty, или преведено, Македонското маратонско кралско семејство – шампионските титули остануваат во семејството!

Атрактивниот награден фонд кој успејаа да го обезбедат организаторите беше предизвик за кој на стартната линија се појавија најдобрите македонски атлетичари/ки на средни патеки, па конкуренцијата беше неоспорна.

НАГРАДИ:

1 место – 10.000 ден.
2 место – 8.000 ден.
3 место – 6.000 ден.
4 место – 5.000 ден.
5 место – 4.000 ден.
6 место – 3.000 ден.
7 место – 2.000 ден.

Освен Кираџиеви, одличен настап имаа и остатокот од тимот на endurance.mk.

Кај дамите, дванаесетта беше Елена Димитровска; додеа кај мажите одлична трка истрчаа и Александар Петров, Бобан Стојановски, Александар Димитровски.

Во името на целиот тим им честитаме на сите учесници и секако на организаторите кои во услови во кои живееме последниве четири месеци, тие сепак собраа сили и волја да ја организараат оваа несекојдневна трка.

 

Permalink