Лиса Стублиќ – Интервју

Подготви Весна Кираџиева

Непосредна и пријателски расположена, Лиса Стублиќ веднаш ми одговори позитивно на моето барање за интервју. Таа моментално е во Њујорк Сити и се подготвува за настап на неделниот полумаратон. Сето тоа, не ја спречи да ми одговори на моите прашања, ексклузивно за сите посетители на endurance.mk.  За оние кои сеуште не се запознаени со името на оваа Хрватска атлетска легенда на долгите патеки, Лиса Стублиќ е Олимпијка и рекордерка во неколку дисциплини. Подетално ќе се запознаете токму со ова интерју.

endurance.mk: Лиса, оваа атлетска сезона ти започна успешно, со национален рекорд на 5000м со 15:59.48. Честитам! Можеш ли накратко да ни кажеш како ти се одвиваше зимската базична подготовка? Дали можеби се подготвуваше вон границите на Загреб и Хрватска?

Л.С.: Благодарам. По ЕП во крос во Будимпешта си земав недела дена одмор, па веднаш потоа влегов во тренинг за оваа сезона. Најглавна цел ми е Цирих маратон на 07 април. Најголем дел од зимата бев на подготовки во Португалија.

Lisa S.

(фото – Лиса С. на ЕП во крос во Будимпешта)

endurance.mk: Која ти беше најголемата неделна километража која ја истрча оваа подготвителна сезона и ако можеш, откриј ни како се одвиваше твојата најнапорна тренинг-седмица?

            Л.С.: Најголема неделна километража во овој тренажен циклус ми беше 206км. Имав по два јаки тренинга неделно и неколку тренинга со среден и лесен интензитет, на кои интензитетот постепено им растеше, како што ми растеше и формата. Инаку, јас и мојот тренер ги работиме сите тренинзи со максимална контрола на тренираноста преку професионална справа за мерење на лактати, со која го мериме нивото на лактати во крвта на секој тренинг кој е појак од среден интензитет.

endurance.mk: Овој викенд настапуваш на NYC Half. Њујорк не ти е непозната територија, таму имаш студирано и живеено неколку години, нели? Кои ти се очекувањата, дали можеби сметаш на нов Национален рекорд?

           Л.С.: Би сакала да истрчам нов личен рекор, нормално. Но, NYC Half ќе има многу јака конкуренција па најголема цел ми е да имам што подобар пласман. Многу сум возбудена за таа трка бидејќи ќе ми биде прва јака трка на која ја познавам стазата. Живеев во NYC од 2002 – 2006 година и скоро секој ден трчав во Централ Парк. А првата половина ќе биде еден круг околу Централ Парк.

  endurance.mk: На стартната листа има еминентни имиња од женската endurance елита, како Kim Smith (67:11), Sara Moreira of Portugal (70:08 PB, Европски првак во сала на 3 000м стипл), Valeria Straneo (67:46, Рекордерка на Италија во маратон), Sabrina Mockenhaupt (68:45, трикратна Германска Олимпијка). Кенијката Caroline Rotich (68:52); Mary Davies од Нов Зеланд (71:49); Британките Claire Hallissey (72:02), Susan Partridge (70:32), Frey Ross (72:23); Јапонката Tomomi Tanaka (69:47); Бразилката Adriana Da Silva (73:16); Мексиканката Madai Perez (69:45). Со твојот резултат од 70:31 имаш шанси да влезеш во топ 10. Се надеваш ли на таков успех?

           Л.С.: Моментално, со 1:10.31 јас сум 11-та. според стартната листа. Мисла дека ако трчам паметно ќе можам да имам пласман меѓу топ 10. Мислам дека сум во подобра форма одколку кога го истрчав мојот личен рекорд, а исто така мислам дека и сите преостанати жени се во подобра форма.

endurance.mk: Освен државен рекорд на полумаратон, твои се рекордите и на 3 000м стипл (10:09.56), на 5 000м. (15:59.48), и на маратон (2:30.45). Ова се резултати на кои би ти позавидувале не само девојките, туку и голем дел од машките, особено тука, на Балканските простори. Те прави ли тоа да се чувствуваш надмоќна, посигурна во себе на стратната линија и како околината гледа на тебе: блиските, но и оние кои помалку те познаваат лично? Се чувствуваш ли како “ѕвезда“? 🙂 

Л.С.: Јас се чувствувам како нормална личност која само трча. Не се чувствувам како некоја ѕвезда или нешто. Мислам дека трчам солидно, но не сум најдобра. На пример, моите рекорди на 3 000м стипл и 5000м не се норми за на Олимпијада, СП или ЕП. Значи има многу жени кои трчаат побрзо од мене. Овде во Хрватска имав најдобро време во маратон и од мажите и од жените од 2010 година до сега,  но, за жал. Во Хрватска нема машки кои само професионално трчаат, па зато и неможе да се споредува. Се надевам дека еден ден ситуацијата на долги патеки во Хрватска, па и во регионот ќе се подобри.

 endurance.mk: Оваа година, во период од 10-18 Август во Москва се одржува СП во атлетика. Да ја очекуваме ли Лиса Стублиќ на стартната линија на маратонската трка?

Л.С.:  – Секако. 🙂

endurance.mk: Лиса, ти благодарам во името на читателите на endurance.mk и ти посакувам голем успех на NYC Half, но и во иднина.

Croation Interview

Permalink