НОВ НАЦИОНАЛЕН РЕКОРД НА Весна КИРАЏИЕВА – 1:28:50!!! 33. Vattenfall BERLINER HALBMARATHON review

              Се остварија прогнозите од претходниот пост. Не сум никаков пророк, туку се докажа уште еднаш како атлетиката е мерлива категорија. Можеше да се предвиди резултатот врз основа на многу параметри.

         Утрово тоа Весна го зачини со нов национален рекорд во полумаратон. Да се потсетиме, пред да прејдеме на главното – претходниот рекорд беше исто така во нејзина сопственост, поставен пред една година, на полумаратонот во Прага и изнесуваше 1:31:06.

             Но еве не од почеток. Конечно после повеќе од два месеца (по кажувањата на веќе резидентот во Берлин, Томас), времето во Берлин се стабилизираше и на денот на трката дури не осветли и сонце … нешто што долго време не го видел Берлин. Температура околу 4 Целизиусови, умерен ветер, но како што би рекле америте – chilly услови. Подучени од претходниот Љубљана маратон, со време си ги завршивме сите загревања и ритуали пред трка и се упативме кон стартните блокови. Нашиот беше блок А, што значеше веднаш зад елитните тркачи. Се ’паркиравме’ во реката тркачи на релативно одлична позиција. Планот беше Томас да ја извлече Весна што повеќе и што подолго. Успеа да наметне солиден ритам од 4мин/км до некаде 10-тиот километар. Понатаму продолжи соло.

        Веќе на 16-ти километар налета на проблем. Стомачни проблеми и верувале или не (а најверојатно не), била приморана да посети некое од мобилните тоалети и да изгуби речиси цела минута. Но храбро продолжи до целта. Јас ја очекував негде на околу 1:28, но влегувањето во целта беше толку масовно што едвај ја забележав Весна. Бев застанат веднаш до целната линија, со поглед директно кон електронскиот семафор и во вистинско време забележав дека Весна влезе под 1:29. Целта беше исполнета – 1:28:50! Тоа што имаше застој на 16-ти километар од биолошки и физиолошки причини, не објаснува дали позитивно или негативно ќе имплицираше на финалниот резултат, но може само да претпоставиме.

          Но, како и да е, несомнено е дека останува простор за понатаму, за отстварување на повисоки цели. Следна станица за Весна е Скопски маратон. Цел. Ќе ја видиме низ улиците на родниот град, пред домашна публика. Таргетот за пролетниот дел од сезоната ќе заврши на Скопски маратон. Но сезоната продолжува понатаму, со нови цели.

             Сосем на кратко за моето учество на овој ултра масовен полумаратон во Берлин (30 000 на стартот, патем). Конечно после 5 недели влечење со повредата на Ахиловата тетива, 0.00км претрчани во тој период и буквално прележан период, се вратив пред 3 недели на тренинзите. Но, правилото после оваа повреда и општо после враќање од било каква повреда од ваков калибар, е да се почне со минимална лесна должина и да се избегнуваат брзински тренинзи, тренинзи на нагорнина, односно само и едноставно да се прават лесни истрчувања. Најдосадниот дел во атлетиката. Така ги поминав моите 3 недели ’подготовки’ до Берлинскиот полумаратон. Првите 5км беа во просек околу 3:33/км ритам, за понатаму да поминам на 10км со истиот просек +/- 2 секунди отстапка и после 15-тиот километар веќе до толку се наталожија лактати, што трката малтене ја дотрчував. 1:16:40 е моето официјално нето време. Сепак долгото отсуство од тренинзи си го наплати данокот, но за мене најбитен и најпозитивен показател беше да застанам на здрава нога, да имам здрава нога за време на трката и најбитно од се – да имам здрава нога после трката. Продолжуваме понатаму, ме чека дооолг пат до Скопски маратон, долга и паметна километража и уште многу други трки во текот на предстојната сезона.

Brandenburg Tor

             Берлин ќе oстане како одлична животна приказна или подобро кажано само една епизода од животот и од нашите endurance серијали. Пред се поради фантастичното гостопримство од нашиот companjor Томас, во што не се ни сомневав, затоа што така функционираме веќе долго време со ’бацито’, а конечно и заради учеството на една толку голема, масовна и престижна трка во Европа. Му благодариме на Томас, им благодариме на пријателите кои секогаш се тука за нас и им благодариме на луѓето кои безрезервно и безусловно не подржуваат во патот кон атлетските успеси! Се гледаме набрзо со нови предизвици.

                Спортски поздрав од Берлин!

Permalink