Ексклузивно Од Кенија: Интервју Со Европскиот Првак На 3000м Стиплчејс (U23), Митко Ценов

Тимот на endurance.mk продолжува со серијалот на интервјуа на големите атлетски имиња. Овој пат на наше огромно задоволство, во интервју за нашиот атлетски медиум го имаме бугаринот Митко Ценов.
А за оние кои незнаат кој е Ценов, еве мал вовед: неговата поголем интернационален успех започна во декември 2012, кога и стана вице шампион на Европскиот крос во Будимпешта (јуниори). Тоа беше показател дека нашиот источен сосед сепак продолжува да продуцира distance атлетичари кои се борат во врвот на Европските престижни натпреварувања.
Еден месец подоцна, тој учествуваше на силниот крос во лигата на Cross Country Permit кросеви – Бели Крос во Белград, каде во страшно силна конкуренција, заврши позади првопласираниот унгарец Barnabás Bene. Одлична трка која одлучуваше во последните метри.
По оваа трка, Ценов имаше одлични резултати и на Државното првенство во Правец, каде успеа да истрча нов национален рекорд на 3000м стиплчејс (8:27.09). Тоа е страшно сериозен резултат, од висок европски калибар.

После овој одличен резултат, Ценов имаше победа на Европскиот Куп и тоа во висок стил, со убедителна победа и уште неколку помали трки, пред да стигне до Европското првенство Во Тампере, Финска. Таму се случи тоа што никој не го посакуваше. Имав прилика да ја следам трката во живо и го видов следново: до звукот на звоното Ценов беше резервиран, на одлична позиција, за во даден момент да тргне и убидително да ја декласира конкуренцијата (меѓу кои беше и шпанскиот тркач со најдобар резултат за 2013та, Abdelaziz Merzoughi), Но уште пред да бидат објавени резултатите, беше констатирана грешка во трката на Ценов, каде се наведува дека е прекршено едно од правилата на IAAF, односно дека во последниот круг, во делот на водената пречка, Ценов стапнал во внатрешната страна на стазата, во недозволениот дел и неговото злато стана од готово – вересија. Тој беше дисквалификуван. Сепак светот виде кој е најподготвен во Европа во оваа дисциплина. Погледнете ја трката тука.

По Тампере Ценов се фокусираше на Светското Првенство во Москва, каде таргетот му беше влез во финале. Со резултат 8:32 во квалификации, за жал не успеа да влезе во финалето. Продолжија трките на Ценов, од неговата основна дисциплина, па се до полумаратон во Подгорица, за да веќе по неофицијалното завршување на сезоната, добие покана од Cross Country митингот во Atapuerca. Таму Ценов имаше скоро перфектна трка и дистанцата од 10км ја помина за 30:01, што беше само неполна минута позади победникот, Светскиот крос кантри шампион, етиопјанинот Imane Merga.

1480636_10201256990807107_1609034005_n

Круна на сезоната за Ценов беше Европскиот крос во Белград, кој се одржа пред неполн месец. Таму во одлична трка се избори за втората позиција на пиедесталот (категорија U23). А еве во прилог, што бугаринот има да ни открие во едно доста интересно интервју за читателите на endurance.mk, но и за сите вљубеници во атлетиката и трчањето воопшто:

endurance.mk: Во очите на endurance.mk, а верувам и во очите на цела европска јавност, ти си Европски првак на 3000м стиплчејс, за атлетичари до 23 години. Но, во Тампере, минатата година златото ти беше одземено. Сметаш ли дека грешката и вината се апсолутно твои лично или можеби некои други фактори се во игра?

М.Ц.: Станав шампион во Тампере, да, но направив една грешка која ме чинеше многу. Сметам дека тоа е само моја грешка и дека никој друг не е виновен за тоа што се случи. Веќе го заборавив тој момент, но сум кажал – ќе си ја вратам титулата и наплатам грешката, тројно!

endurance.mk: Моментално си на висински подготовки во Итен, Кенија, локацијата каде се раѓаат шампионите. Како се одвиваат твоите подготовки и колку долго ќе трае твојот подготвителен циклус во Итен? Со кого тренираш моментално?

М.Ц.: Во Кенија сум, да, но не во Iten, туку во Kericho. Ќе останам тука уште 45 дена, поминаа веќе 17 и на 1ви февруари тргнуваме назад за Бугарија. Од Бугарија, ако е се во ред, можно е да одиме малку во Истанбул, Турција, да се изработат тренинзи во сала. Инаку тука тренирам со дечките од мојот тим, како и со двајца локални кенијци.

1507970_10201354486164430_2137916371_n

endurance.mk: Имаш уште две цели години до 23 години. Сметаш ли дека е возможно да го совладаш Европскиот рекорд U23 на 3000м стиплчејс, на австриецот WIDLINGER Günther (8:10.83)?

М.Ц.: Имам уште две години и точно и за тоа тренирам и се борам – да го совладам тој рекорд. Сметам и очекувам оваа година да истрчам 8:15, а здравје наредната година да одам резултат под 8:10. Само здравје и континуитет во тренажниот процес и резултатот сам ќе си дојде.

endurance.mk: Оваа година (2014) е неолимписка, но во март (9ти) се одржува Светското првенство во сала, во Сопот, Полска. Какви се твоите планови за таму, со оглед на тоа што нема 3000 стипл во сала како дисциплина?

М.Ц.: 3000м е во план. Норма за СП во Сопот на 3000м е 7:51, потребно е да ја исполнам и да си обезбедам виза за Сопот. Мислам дека можам да идам 7:45 без проблем. Можно е да настапам и на 3000м и на 1500м и ќе бидам задоволен со едно финале или со најдобро лично постигнување на 3000м.

endurance.mk: Околу твоите тренинзи и исхрана. Која е твојата просечна неделна километража во Итен? Каква е твојата исхрана на дневно ниво? Се работи за стриктен строг режим или пак е флексибилен, во зависност од дневниот тренинг по програма?

М.Ц.: Неделна километража ми е некаде околу 150-170км. Во зависност од тоа какви ми се тренинзите, така и ја адаптирам храната. Немам некој стриктен режим, јадам супа и многу салата, а главното јадење е зависно од она што ми е приготвено.

endurance.mk: Оваа година на истата дата на СП во сала (9ти), во Скопје, тимот на endurance.mk ја одржува четвртата традиционална крос трка Gazi Baba XC Challenge. Најмасовна крос трка во земјата, па нескромно кажано и една од лидерските организации во регионот. Дали би можеле да те очекуваме наредната година (или можеби и оваа доколку Сопот не е во игра) да ја збогатиш оваа трка со твоето присуство, со оглед на тоа што се најавуваат силни имиња од Словенија и Унгарија?

М.Ц.: Може да ме очекувате. Ако не сум во Сопот, тогаш доаѓам во Скопје да трчам на вашиот крос. Не е проблем, ветувам дека ќе дојдам, овој март доколку работите не одат по планот за СП во Сопот, можете да ме очекувате во Скопје, да направиме една јака трка.

420516_2860729517645_136741459_n

Permalink