Рок дуото Next Time со настап на Gazi Baba XC Challenge и Скопски маратон

Се сеќавате на Златно славејче `96 година и песничката “Фудбалер и Кошаркар“ во изведба на Мартин и Стефан? Тоа е далеку пред времето на  Next Тime. Време кога нивни идоли беа Роналдо и Џордан. Се додека Bon Jovi и Slash не ги заменија. Или барем навидум.

2 next time(photo: настап на Next Time на Eurovision `09)

Рок дуото Next Тime најдобро ви е познато по својот феноменален настап на Евровизија и нивната “Нешто што ќе остане“. Овој пат, ќе ги видиме во друго светло, на друг вид на настап – настап на двата најголеми и најмасовни атлетски настана во Македонија: Gazi Baba XC Challenge и Скопски Маратон. И покрај нивните музички ангажмани, работата во студио и тренинзите, тие издвоија време за нашите читатели на endurance.mk и ни споделија некоја тајна за нивната пасија кон спортот, која ја имаат од најмали нозе.

endurance.mk: Македонската јавност најдобро ве знае преку вашите успеси на Македонската музичка сцена како рок дуо. Но, имате и уште неколку скриени таленти и интереси, надвор од музиката. Знам дека редовно спортувате во некој од спортските објекти  кои ги нуди СРЦ Борис Трајковски, но и често можеме да ве забележиме на кејот на реката Вардар, без разлика дали трчате или сте на велосипед. Од каде оваа пасија кон спортот и негово практикување?

Next Time: Спортот е една од најважните работи во нашите животи, едноставно не можеме без спорт. Се започна уште многу одамна кога како деца почнавме да тренирме фудбал во разни клубови. По фудбалот, продолживме со музиката, но никогаш не му свртевме грб на спортот. Се на се, може да се каже дека сме спортски личноси кои што уживаат во спортувањето.

endurance.mk:  Мартин лани настапи на трката на 5км на Скопски маратон, а оваа година се одлучивте и двајцата да одите чекор понатаму и да се пријавите на доста посериозна делница, на полу маратон (21,097км). Ова е само нов и поголем предизвик за вас или минатата година на Мартин му си видоа малку 5-те километри, па те советуваше и тебе Стефче да се “дружите“ заедно на полу маратон годинава? 🙂

martin next time(photo: Maртин Филиповски (Next Time) на Скопски маратон `13)

Next Time: Точно така, Мартин минатата година трчаше на трката на 5км, па веројатно му се виде кратка оваа делница, така за оваа година решивме да одиме малку поамбициозно. Се чувствуваме подготвени за таков подвиг бидејќи не работиме на нашето тело само пред летото колку да изгледаме убаво, напротив, спортуваме преку цела година и сметаме дека можеме да го совладаме и тој предизвик.

endurance.mk:Како се подготвувате за овој предизвик? До каде сте со тренинзи, подготовки? Знам дека често тренирате со мојот брат, а ваш драг другар Александар Кираџиев, дали тренирате според негови совети и консултации и како тоа ви оди?

Next Time: Александар е нашиот спортски херој за издржливост, упорност и амбициозност. Од секогаш сме се прашувале од каде ја бара таа мотивација и амбиција кога станува збор за атлетиката во земја каде што самата атлетика е крајно запоставена, секоја чест. Главните наши подготовки се состојат од тоа што играме фудбал 2-3 пати неделно, еднаш во неделата го искачуваме Водно со трчање и редовно посетуваме фитнес за зајакнување на мускулатурата. Од средина на март ќе почнеме да трчаме и на кејот на Вардар каде што барем 2 пати во неделата би требало да трчаме по 12км на ден. Од април ќе зголемиме километража и за крај, се гледаме на Скопски 😉

arhiva martin stefan kiradjiev(photo: aрхива на endurance.mk, извадок од месечен магазин “Свет“)

endurance.mk:  Во меѓувреме, ние, тимот на endurance.mk ја организираме најмасовната cross country трка во Македонија (Gazi Baba XC Challenge), која воедно e и главна подготвителна трка пред Скопски. Ова е  крос-трка каде активните и рекреативните атлетичари од цела земја можат да си ги измерат силите. Разбрав дека ќе не удостоите со ваше присуство. Ајде и официјално потврдете ни го тоа, и кажете ни какви се плановите и очекувањата?

Next Time: Официјално го потврдуваме учеството 🙂  Плановите ни се рекреативно да истрчаме, има атлетичари кои што треба да се тркаат поамбициозно 🙂

6 next time

 Тимот на endurance.mk ви благодари и на двајцата што издвоивте време за нас и нашите читатели  и покрај вашите обврски меѓу создавање музика и тренинзи.

Permalink