Национална арена Филип II, домаќин на Сениорско Поединечно Првенство

                Во сабота (19-ти Јули), на Национална арена Филип 2 во организација на Атлетската федерација на Македонија, се одржува Државното поединечно првенство на Македонија за Сениори-ки.

                      Натпреварите започнуваат во 16.30 часот, а на дневниот распоред се следниве дисциплини:

Мажи: 100м пречки,400м пречки, 100м,200м, 400м, 800м, 1500м, 5000м, Височина, Далечина, Трискок, Ѓуле(7.26кг), Копје (800гр), Диск ( 2 кг)

Жени: 100м Пречки, 400м пречки, 100м, 200м, 400м, 800м, 1500м, 5000м, Височина, Далечина, Трискок, Ѓуле(4кг ), Копје (600гр), Диск (1кг)

         Oвој натпревар воедно ќе има изборен карактер за престојното Балканско првенство за Сениори кое ќе се одржи на 26-27 Јули 2014, во Питести/Романија.

DSC_0380_resize

                     Пријавувањата за трките се веќе завршени, а се водеа ИСКЛУЧИВО преку Атлетските клубови.

                   Зошто го подвлекувам ова “исклучиво“? Во последниве сезона-две, сме сведоци на порастот на љубители на трчањето и рекреативното трчање, а на наше огромно задоволство.

             Но, сакаме да направи разлика меѓу активните атлетичари (да не речам професионалци, бидејќи сме дааалеку од тоа) и рекреативните љубители на трчањето. Секако дека масовните трки од типот на Скопски маратон, Гази Баба XC Challenge и уште неколку помали трки, со задоволство ги отвораат своите врати за настап на сите љубители на трчањето, без разлика на нивната физичка подготвеност. Но, тоа не значи дека и Сениорските купови и поединечните Државни Првенства се од ист карактер. На последните неколку вакви натпревари се повеќе забележуваме рекреативни тркачи кои немаат посериозни намери и потенцијал за високи резултати, освен дружење и забава. Секако ова не можеме да го префрлиме само како вина на оние кои се пријавиле, тоа е и пропуст на организаторите, кои пак ги дозволиле нивните настапи и пријави.

endurance.mk

                        За настап на Државни првенства и купови, во спортски и атлетски поразвиените земји, се земаат во предвид резултатите на пријавените атлетичари од изминатите 6-12 месеци како еден вид на норми или влезни времиња, за да атлетичарите имаат право на настап на овие првенства. Се земаат како показател за нивната подготовка, а тоа не се прави со цел да се потценат рекреативците, туку да се даде на тежина, сериозност и професионалност на натпреварите.

                     Ако ова е прекомплицирано и нема да ме разберете, ајде вака да пробаме: да трча рекреативец на Државно првенство на 10 000м., е исто како некои маалски фудбалери кои победиле на турнирот во маало да ги пуштат да настапат во Прва лига на Куп на Македонија во фудбал! Смешно и нелогично, нели? Епа тоа е исто и во атлетиката. Атлетиката е најфлексибилна и најблагородна кога станува збор за мешање на професионалци и рекреативци на иста стартна линија. Но сепак, за некои дисциплини и натпревари, мора да се почитуваат и некои норми и граници, а се со цел да се воспостави меѓусебна почит и напредок, а трките да добија тежина и сериозност.

                     На крајот на краиштата, ќе појдам од себе: јас не се осудувам да се пријавам на Државно првенство со моите (моментални) 5’20” на 1500м. и 2’30” на 800м. Затоа, ќе си го сместам задникот фино на северна трибина и ќе навивам и ќе им дадам подршка на моите колеги, долу на жешкиот aзурен тартан! Повелете и вие!

                     Влезот е слободен за сите љубители на овој спорт!

Permalink