Кафе? ДА, молам.

Страшно ме зачудува фактот, што се уште постојат луѓе кои кога ќе им кажам дека сум атлетичарка, ќе ми кажат: “ама добро, вие сте спортисти, не пиете кафе и алкохол“.
Не знам всушност од каде произлегол овој мит, според мене, еден од најголемите во светот на атлетиката и спортот воопшто. Дали е од истите оние книги од Советскиот Сојуз од 60-тите, дали е од оние тинејџерските списанијата за мода, па се провлекла и некоја приказна за кафе и спорт… Не знам, ама никако да најдам логика на ваквиот став дека спортисти не треба и не пијат кафе (и алкохол).
Никој не спомна дека треба да се труеме со кафе или да бидеме алкохоличари. Едно пиво после јак тренинг или трка, или чаша вино се всушност одлични и препорачливи за секој организам. Ама да се вратиме на кафето.

coffee run
Може дури и да ви делува изненадувачки, но според голем број на истражувања, кофеинот е веројатно еден од најефективните ергогени додатоци кои индјуренс тркачите може да ги користат.
Според истражувањата од Ohio State University и Human Nutrition, Omaha, Nebraska, кофеинот ниту ќе ве дехидрира, ниту пак ќе влијае негативно на перформансот. Напротив, кофеинот помага да се мобилизираат мастите на тој начин да се согоруваат повеќе масти, а помалку гликоген за време на трчањето. За endurance трки, кои траат повеќе од 1 час ова е исклучително важно, бидејќи телото содржи, безмалку неограничена количина масти, но ограничена количина на мускулен гликоген. Сепак, внимавајте со дозата, претерување може да предизвика раздразливост, живчаност, нервоза, а некои и со помала количина имаат стомачни потешкотии или да ви делува како лаксатив.
Затоа, како и секогаш ќе ви повториме да не тестирате ништо пред трка. Колкава доза и дали воопшто ви одговара кафето на вашиот организам, тестирајте и навикнувајте се да го консумирате на тренинзите, за да не го изненадите организмот на самата трка (или важен тренинг).
Доколку пак се одлучите да земате кофеин (во таблетка), според истражувањата се препорачува по 5 милиграми кофеин на секој килограм oд вашата тежина, непосредно пред физичка активност.
Постојат и дебати околу консумирање на инстант и варено (турско/македонско) кафе. Јас сум голем љубител на Нес кафето, кое е инстант. За мене е најдобрата опција која сум ја пробала, а сум пробала секакви видови, сакам да експериментирам.
За време на мојот престој во Љубљана ме зачуди идејата дека скоро никој и да не пиеше Нес кафе. За онакво Нес како што си знаеме ние со ладно млеко и пена во висока стаклена чаша не ни знаеја, ниту во кафулињата. За мене катастрофа (на крај си земав миксерче па си го матев по дома кафенцето). Таму на големо пијат турско кафе. Да, така и го викаат – турско. Дури и редовно бев советувана дека ова било поквалитетно од инстантот, што и до некаде држи вода. Јас, секогаш расположена за експерименти низ кујна, пробав и од ова.

brewed coffee

Дури и си набавував квалитетно арабика кафе во зрно па си го мелев тазе по дома (кај нас го има во La Cha), или Starbucks во зрно, кога бев на трки вон Балканот. Дури и научив техника за ладно цедено кафе, еве ви линк во прилиг, ви го препорачувам на оние кои не пиете Нес (инстант кафе), одлично е на овој начин:


Долгата приказна на кратко – пак завршив на моето старо добро Nes кафе. Едноставно тоа сум забележала дека единствено ми одговара, ме буди и ме држи будна и го чувствувам неговиот ефект на мене. Турските (варени) кафиња воопшто не делуваат, а и вкусот не ми одговара воопшто.
Плус, сеуште не сум налетала на некое истражување кое со факти би ми го потврдило драстично негативниот ефект на инстант кафето во споредба со ова другото. А и повеќе од еднаш сме ви спомнале – атлетскиот организам е машинерија која на големо меле и преработува се што влегува во физички активниот метаболизам. Не се споредувајте со оние кои 2 пати годишно трчаат: по автобус!

coffee & cookie
Не сум суеверен тип, но пред трка или појак тренинг, шоља топло Нес со малку млеко и рамна лажичка кафен шеќер ми се ритуал кој не смеам да го пропуштам.
Сепак, вие си ги знаете вашите ритуали, па држете се до нив, или експериментирајте за време на тренажниот процес, додека не ја најдете вашата идеална комбинација.

Permalink