Желба ми е да истрчам уште една трка на 100 метри: интервју со Драган Стојчевски

Овој дечко, повеќето го знаете како еден од најексплоатираните машки модели на Македонско тло. Во 2004 се закити и официјално со титулата Мистер на Македонија, за две години подоцна, на Светскиот избор во Кина, 2006, да се закити и со титулата Мистер Европа.
И сигурно веќе се запрашувате што една ваква фаца бара на простор како endurance.mk?! Да не сме станале и ние како оние секташки трачерски портали?! Одговорот, веќе претпоставувате дека секако е НЕ. А еве и зошто.

Драган на еден од сетовите за снимање на реклама

Драган на еден од сетовите за снимање на реклама

Со Драган Стојчевски се познаваме многу пред неговата кариера како манекен и модел. Безмалку 18-тина години, некаде од самите наши атлетски почетоци. Го делевме истиот легендарен тренер за кој ве имаме замарано повеќе пати, Методија Веновски – Мето. Беше атлетичар на 100, 200 и 400 метри. И тоа одличен спринтер, државен шампион (всушност како и сите од школата на Мето, без сомнеж), а уште поуспешен во скок во далечина и трискок. Јас и Аце тогаш уште бевме дечишта во основно – јас уште бев повисока од Аце 🙂 А Драге, Тетоецот беше од “големите“ и секогаш знаеше да “ували“ некоја шегичка. Сеуште е таков: шегобиец кога е моментот, но срамежлив, емотивен и скромен.
Во меѓувреме, неколку пати ни се вкрстуваа патиштата. Во периодот кога ние студиравме на Полициска академија, ќе налетавме на него бидејќи во тој период тој беше дел од курсистите во Центарот за обука, за да сега, кога сите пораснавме, успевме да седнеме и да си го пооговараме животот од Мето навака.
И така се роди идејава за интервјуво, особено зошто Драган има да ни сподели новости околу неговите нови спортски амбиции, а за кои ќе ви раскаже во интервјуто.
Endurance.mk: Драган, публиката те знае претежно како манекен и модел од модните писти, списанија и видео записи. Но ти си мноу повеќе од убава фаца. Моментално вработен во Центарот за основна обука за полицајци во Идризово како советник наставник по одбрамбени техники и моторички способности, а пред тоа беше инспектор во одделот за дрога и оружје во Тетотво. Како твоите колеги и студенти реагираат на тоа? Дали можеби те препознаваат и какви реакции има откако ќе дознаат кој си?
Драган: Од моите – во случајот идни и сегашни колеги бев препознат од неколку, меѓутоа не ми е тоа главна окупација дали некој ме познава или не, секогаш во животот сум се трудел да бидам прво човек, па потоа се останато. За жал денеска ретко можеш да најдеш добар и чесен човек, но ги има, секогаш господ на некој начин успева да ги спои добрите луѓе 🙂 . Пред да ме запознаат, се разбира тие што не ме познавале лично биле пријатно изненадени од мојата комуникација и дружење со истите, и ми имаат напоменето дека ретки се тие како мене. Јас им кажувам дека рецептот е едноставен: биди едноставен, комуникативен, кон секого гледај како на пријател. Но, ретки се тие што така размислуваат, сепак за жал живееме во време кога ретки се пријателствата помеѓу лугето, секој се гледа со некого од интерес. Многу ми е жал што е така, но едноставно така функционираме… Но веќе се навикнавме на вакво темпо на живот, сепак тоа не значи дека и јас сум како еден од тие 🙂

dragan s.7

Endurance.mk: Од Србија, пред некој ден ни се врати со нова титула. Имено, изминатиов викенд во Панчево се одржа Државно првенство во борење со рака. Ти си победник во категорија до 75кг и победи во двете категории: со лева и десна рака. Пред се, ти честитамe за успехот! Ајде кажи ни за подготовките, конкуренцијата и целокупното искуство на овој тип на натпревари?
Драган: Токму така во Србија (Панчево) секоја година се организира државно првенство во борење со рака. Секоја година јас сум присутен на тоа нивно првенство како судија, но и понекогаш како натпреварувач, сепак е тоа нивно државно првенство. Јас имам голема привилегија кај нив, затоа што, иако ќе звучи нескромно, ќе кажам дека јас сум творецот за овој спорт кај нив на некој начин и истите многу напреднаа во овој спорт, си отворија клубови, направија федерација и сега доста добро котираат на балканските првенства. Јас ја имав идејата и за кај нас, меѓутоа, тука не бев довоно ценет за жал и не успеавме. Ако веруваш повеќе ме ценат еве и ден денес во Србија, пред се како човек, а после како натпреварувач 🙂 .

 

Endurance.mk: Секако, за жал таква е ситуацијата во сите спортови, па и во секоја друга област, најверојатно се работи за завист кога најдобрите се во прашање. Кажи ни, како стигна до пиедесталот?

Драган Стојчевски на натпреварот во Србија каде победи во својата категорија

Драган Стојчевски на натпреварот во Србија каде победи во својата категорија

Драган: Годинава бидејќи се подготвувам за претстојното првенство на Македонија во бодибилдинг и фитнес, па со правилна исхрана несвесно успеав да дојдам до 75 килограми каде што бев во таа категорија, и решив да се борам и со лева и десна рака. Околу подготовките, секако дека се подготвував паралелно за борењето и за фитнесот, се потрудив со доста вложен труд во себе. Во мојата категорија имаше 15 натпреварувачи, од самиот почеток на мојата прва борба до крајот немав ниеден пораз и така успеав да бидам прв во таа категорија и на лева и десна рака… Сега не би можел да кажам за конкуренцијата затоа што секогаш се борев во категорија до 85 килограми, но верувам дека сите што се пријавиле на тој натпревар верувале дека се јаки и верувале во нивната сила, сигурно тука не би дошол некој што тренира шах на пример, нели ? 🙂

Endurance.mk: хахаха, не се знае, особено ако тоа беше државно првенство на Македонија, малку повеќе ни се изместени вредностите кога е спортот во прашање. Добро, ми спомена дека во пресрет имаш нов предизвик, а тоа е натпреварот во бодибилдинг и фитнес кој викендов (25-ти април) ќе се одржи во Дом на АРМ. Ова и не е некоја новост за тебе со оглед на тоа што имаш настапувано на натпревари во бодибилдинг и борење со раце. Овој пат ќе настапуваш во категорија на фитнес натпреварувачи. Како ти одат подготовките до сега и какви ти се амбициите: само да се појавиш и настапиш или можеме да очекуваме и пиедестал?

dragan s.2

Драган С. како судија на натпревар во Србија: “Секоја година јас сум присутен на тоа нивно првенство како судија, но и понекогаш како натпреварувач“

Драган: Токму така, новиот предизвик ми е државното првенство на Македонија во фитнес и бодибилдинг, кое што ќе се одржи во Скопје во Дом на Арм со почеток во 19:00 часот, па да ја искористам оваа прилика да ги поканам сите љубители на ваков тип натпревар да дојдат и да одвојат малку време, се надевам дека убаво ќе си поминат.
Новост за фитнес да, прв пат се натпреварувам во категорија “физик“ каде што ќе бидеме поделени во две групи мислам, зависи колку натпреварувачи ќе се пријават. Првата категорија ќе биде до 179см, а втората над 179см висина.
Што се однесува до подготовките, се подготвувам точно два месеца за овој натпревар. Тука би напоменал дека во стручна соработка со еден мој драг пријател од Белград кој се вика СТЕФАН РАДОЊИЌ. Тој е првак во Србија во бодибилдинг класик категорија, сепак ова мое подготвување му го препуштив на него, затоа што сметам дека е искусен и компетентен да ме советува и да ме насочи на вистинскиот пат – ќе напоменам ПРИРОДЕН ПАТ, да дојдам до успех, прво за него, а потоа и успех за мене.
Воедно овој мој предизвик или иницијатива како сакате ја покренав затоа што многу луѓе во нашава земја (само да не ме сфати некој погрешно) имаат слаба едукација за исхрана и луѓето кои не сакам да ги именувам (од хербалајф), им го уништуваат здравјето, а мојот доказ дека со правилна исхрана и редовен тренинг може да се дојде до посакуваниот резултат. Значи на луѓето им останува само да имаат желба и резултатот ќе биде тука и навистина ми е многу криво, просто не можам да верувам како манипулираат со луѓето, им земаат пари, прават бизнис со нив, без да им биде грижа за нивното здравје. Навистина е жалосно тоа, па би сакал малку да ја поткренам свеста кај граѓаните да не наседнуваат на нивните лаги, верувајте, тие шејкови се ГЕНЕТСКИ МОДИФИЦИРАНИ, но верувајте, ќе се најде некој, еве можеби во случајов ќе бидам јас што ќе ги убеди граѓаните да не купуваат од тоа ЃУБРЕ ОД ХРАНА

Драган Стојчевски (во средина), победник на државното првенство во Србија во категорија до 75кг.

Драган Стојчевски (во средина), победник на државното првенство во Србија во категорија до 75кг.

Се надевам ќе имам прилика повторно да дадам и со задоволство ќе дадам интервју доколку вие сакате се разбира малку повеќе во врска со нивните производи. Би сакал само да додадам на сето ова за хербалифе, една нивна презентерка ми рече: зошто шириш невистини во врска со нашите производи. Нејзиното прашање беше: Што ти е тебе интересот да го зборуваш сето ова? Јас нормално дека немам интерес, освен здравјето на луѓето кои ме опкружуваат. После ова, мислам, дали е потребен коментар или да продолжам да зборувам? НЕ… Оставам на граѓаните да одлучат што понатака… 🙂

Јас навистина се извинувам што малку повеќе се фокусирав на нив, меѓутоа доста е веќе, време е граѓаните малку да им се поткрене свеста дека без физичка активност нема резултати…
Што се однесува на прашањето дали очекувам пиедестал, искрено не ја знам конкуренцијата, но сепак имам големи амбиции да бидам нескромно ќе кажам да бидам меѓу првите. Со моите 36 години мислам дека ќе бидам најстар таму 🙂 Но годините и не се толку важни доколку си физички активен и упорен во тоа што го работиш, се разбира ќе ми треба и подршка од публиката, од Стефан (тренерот) веќе ја имам… Па останува да дознаеме и да видиме во сабота 🙂

 

Endurance.mk: Да Драган, кога веќе ги спомена вештачките суплементации, тимот на Еndurance.mk е целосно на твоја страна, тука сме на иста фрекфенција. Особено во фитнесот и бодибилдингот, многу се популарни, натреварувачите ги користат со цел да изгледаат помоќно и напумпано на сцена. Некои натпреварувачи се фалат со прашкови, протеински шејкови, херба тревки, краставици и тиквици во прав, креатини, стероиди, топачи на масти… Дали и колку ти користиш вакви вештачки производи и кој е твојот став по однос на вештачката исхрана и производите кои се повеќе се шират на Македонскиот пазар?
Драган: Кај нас дојде време да се што лета и што некој го презентира како производ се јаде… Веќе кажав во мојот претходен одговор за тие работи… ако верувате, веќе ми е мака од тие од хербалифе и не би сакал пак да се навраќам…
Јас лично, како додаток во исхраната користам козја сурутка со органско потекло. Верувајте, вкусот и не е баш убав, меѓутоа е многу здраво. Кој може да го пие би било многу убаво да го консумира. Користам глутамин, значи заедно со козјата сурутка, потоа, некои витамини и аминокиселини плус. Се друго ми е базирано на исхрана, со соодветен внес на јаглехидрати и останато…

 

Драган сеуште гордо ја носи тетоважата на неговот десен бицепс со поранешниот заштитен амблем на IAAF (Интернационална Аматерка Атлетска Асоцијација)

Драган сеуште гордо ја носи тетоважата на неговот десен бицепс со поранешниот заштитен амблем на IAAF (Интернационална Асоцијација на Атлеттски Федерации)

Endurance.mk: Како девојка, морам да признаам дека и покрај твоите 36 години сеуште изгледаш заводливо и подобро од добри 90% на 25 годишни момци (се надевам сопругата нема да го чита ова, шега ). Тука ќе го споменам и фактот дека си среќно оженет и имаш двеипол годишно синче. Јас и дечките од Endurance.mk тимот сме многу често во конфликт со луѓето од нашата околина кои, како да ни се закануваат со она “ќе видиш ти кога ќе се омажиш/ожениш“. Ти, на некој начин си пример, инспирација и мотивација која ги крши сите тие застарени размислувања на луѓето кои во брачниот живот наоѓаат засолниште за своите лоши навики и избирање на полесниот пат, далечинско, ТВ, кикирики и пиво и кутија “Домачица“. Како ти балансираш помеѓу работата на релација Тетово- Скопје-Тетово, семејството, модни ангажмани кои сеуште повремено ги добиваш и тренинзите за фитнес, бодибилдинг и борење со рака? Што ќе ги советуваш оние од погоре споменатата група на луѓе?
Драган: За овој ваш комплимент баш се чувтвувам поласкано… 🙂 Ви се заблагодарувам од срце…
Да, среќно сум оженет, мојата подобра половина Бојана е од Белград и имаме синче кое има 2 ипол години и се вика Данило 🙂
Искрено би сакал да бидам инспирација за помладава популација – јас би ја нарекол младина. Малку да посветат внимание на нивното здравје, меѓутоа бидете сигурни дека ако некој правел споредба со некого, ја правел со некого што изгледа полошо од него, за човек да има цел во животот мора да има и мотив нели 🙂 .
Лично јас, со спорт се занимавам, па да не претерам, ама 20 години, од кој 12 тренирав атлетика (да не навлегувам сега во тоа), меѓутоа, не е за никого доцна да почне малку со физичка активност, што јас подразбирам да внимава на себе. Прво, да почне да пие секој ден 2-3 литра вода, да има физичка активност во текот на денот, еве нека биде за почеток по половина час, никој не бара од него да постигне некој резултат, да речеме на 100 метри како пример само го кажувам да истрча 11 секунди. Човечкото тело е создадено да има физичка активност. Кај нас (како нација зборувам) многу мал процент на луѓе се активни физички. За да најдеме оправдување јас мислам дека во светов ни нема рамни, меѓутоа викаат не барај оправдување, најди начин во текот на денот да потрошиш некоја калорија 🙂
Во конкретниов случај, јас станувам во 05:15 часот. Пијам чаша до две млака вода, тоа ми е прво што го правам после станувањето. Во 06:00 ми е автобусот за Скопје, од Скопје ме зема друг автобус и ме носи до работа (Идризово). Веднаш по моето пристигнување во 08:00 јас се пресоблекувам и одам на тренинг. На тренинг веќе од 08:15 часот, а некои не можеш со кофа вода да ги разбудш од што им се спие 🙂 Потоа, имам часови, нели, со кандидатите од основната обука. Со работа завршувам во 16:00 часот, во Тетово сум околу 17:30 часот. Доаѓам дома, ручам со семејството и веднаш излегувам бидејќи сум и личен тренер тука во Тетово имам двајца дечки што ги вежбам и со нив сум час и половина. После ова сум си дома со сопругата и Данило, кој не знае дека сум заморен и бара од мене да се играме, меѓутоа сакал-несакал, мора да му се посвети внимание. Морам да ја пофалам мојата сопруга дека доста време е со него и многу ми помага со тоа што го чува, морам да кажам дека има дебели нерви, сепак горе-долу повеќето знаат како е да се чува мало дете, особено кога децата се хиперактивни 🙂
Луѓето би ги советувал (не мора да ме послушаат нели), секој си избира што ќе прави со животот, нека најдат време за себе, за семејството, да бидат активни во текот на денот, и да внимаваат што јадат, едно од најважните работи во животот и да внесуваат 2-3 литра течности, а јас под течности подразбирам само вода, а не газирани пијалоци, или шејковите на хербалифе и слични вештачки суплементации.

 

Драган Стојчевски на тренинг

Драган Стојчевски на тренинг

Endurance.mk: Убаво што предмалку ја спомена и твојата поранешна атлетска кариера, на овој простор (еndurance.mk) сме нели, пред се за тоа. Имаш резултати од 11:27 на 100м; 23:30 на 200м и 50:60 на 400м. Секако, вредни за споменување се и твоите резултати во скок во далечина (6.70м) и трискок (13,70 m) во кои категории своевремено беше и Државен шампион. Голем дел од атлетичарите кои денес натпреваруваат на овие дисциплини можат да ти позавидат на овие твои резултати. Дали има моменти кога ти недостасува атлетиката и тој вид на натпревари и адреналин, па можеби, гледајќи ги моменталните резултати, дали ти паднало на памет да и се вратиш на патеката и да “им одржиш лекција“ на помладите конкуренти?
Драган: Што се однесува до мојот спорт, атлетиката, прво и основно сум ја тренирал од љубов, со моите 13 години почнав полека да навлегувам во спортот, без да знам дека тоа еден ден ке ми донесе би кажал прво здравје, па се друго останато. Искрено резултатите можеби не се кој знае какви, тренинзите сум ги правел на несоодветна патека во Тетово, но сепак порано имаше и поголемо пријателство помеѓу луѓето, криво ми што сето тоа полека згаснува… и многу е сега помал бројот на спортисти кои се занимаваат со спорт.
Најголема кривица со моето започнување да се занимавам со атлетиката е на мојот татко, кој сакал дека додека сум јас на таа возраст (нели секој има вишок на енергија), таа вишок на енергија да ја насочам во спорт. Само како пример морам да кажам дека кога во зима секој човек е послабо активен, татко ми ме мотивираше да правам стомачни и склекови додека трае зимат, па кога ќе дојде пролет дека ќе ми купи патики… 🙂 И јас нели, како секој млад секоја зима несвесно сум посветувал внимание, да еден ден мене тоа ми прејде во навика и еве сега ден денес сум активен, можеби не во атлетиката, но во фитнес да.
Секако дека ми недостига атлетската патека во Скопје, во Велес, во Охрид и секако адреналинот, особено на трките на 400 метри кога последните 50 метри ми беше најтешко и во тие моменти доаѓа подршката од клубските другари и тренери, а ти во тие моменти даваш се од себе да ги истрчаш и тие последни метри кои останале… Па дружењето со луѓето кои го тренираат овој спорт, сепак тоа е животот, остануваат само спомените и убаво е човек да ги споделува со луѓето кои се истомисленици. Животот е многу краток, па сепак да го паметиме по убави работи… Желба ми е да истрчам уште една трка на 100 метри, да се потсетам на времето кога трчав, а сигурен сум и знам, бидејќи се познавам самиот себеси дека ќе биде и тоа еден ден кога заедно со мојот син, ќе ја истрчаме таа трка 🙂 .
А за лекции давање не знам баш, можеби ако и се вратам на атлетиката, по едно добри две години тренинг… можеби… сепак ќе размислам за давањево на лекцииве 🙂 .
Драган, Ти благодариме за издвоеното време во името на целиот тим и на сите читатели на endurance.mk.
Воедно, ти посакуваме голем успех на 25-ти, а нас ни останува во твое име да ги поканиме сите во дом на АРМ во 19:00 да дојдат и да те подржат во твоите амбиции. Ние се гледаме таму!
Драган: Ви благодарам од срце, и ми беше чест што го дадов ова интервју за вас, особено за тебе Весна. И мене ми останува да ги поканам сите љубители на спортот, да дојдат, а воедно и ќе ми направат чест сите оние кои ме познаваат да ми ја дадат нивната подршка да бидат дел од атмосферата која не се сомневам ќе биде на завидно ниво 🙂

Permalink