Протеински микс (омлет од јајца со моркови)

Верувам дека веќе сите знаете дека по тренингот, најдобар и најбрз опоравок на мускулите е протеинската исхрана. Ако и вие, како и нас не се занимавате со поедноставнат и наздрава опција на протеински шејкови во прав и исхраната ја базирате на природни протеини кои за среќа ги има во изобилство во природната исхрана, еве уште еден интересен предлог кој го практикуваме ние во #endurancemkkitchen.

Често ни се случува вториот тренинг (попладневниот) да го правиме подоцна, особено во летните периоди кога поради високите температури сме принудени тренингот да го започнеме околу 193о – 20оо часот, па тоа значи дека некогаш завршува и до 22оо. Секако дека тогаш размислувате оброкот пред спиење да биде полесен, па стек не секогаш е опција. Милкшејк можеби? Одлична идеја, но тоа ќе биде добро да ве засити во првите половна час, можеби еден час, но по тренингот, организмот работи забрзано и потребно му е нешто повеќе, за да може нормално да работи во текот на ноќта и споро да согорува енергија до утрото.

Затоа, честа опција се јајцата. Ние не се замараме со тоа дали имале холестерол, дали требало жолчките да се вадат и секакви глупости кои ги читате по трачарските портали. Да, имаат холестерол, но колку ќе изедете вие? 5-10 јајца на ден? 120 во текот на неделата? Сигурно не. Најверојатно десетина во текот на неделата. И со потрошувачка на атлетичар или рекреативен тркач, тие вредности се занемарливи.

Е сега, за да не ви здосади истата комбинација на јајца, многу добро е да се манипулира со нив, особено што се продукт со блунткав вкус, па што и да им додадете, убаво ќе се вклопи во комбинацијата. Една идеја ви имав постирано пред некое време, доколку не сте ја виделе и пробале, може да ѕирнете тука.

Во продолжение, ќе ви дадеме уште една интересна идеја за да го направите омлетот од јајца поинтересен и поздрав. Протеините секогаш е најдобро да се комбинираат со зеленчук, па јас ги избрав морковите.

Морковот е богат со витамин А, С, В-6, калциум, магнезиум, мал процент на железо и голем процент на потасиум и содиум. Потасиумот и содиумот работат взаемно во организмот и го регулираат движењето на течностите и хранливите материи. Преку овој систем тие помагаат за балансирана хидрација на ќелиите. Мускулите исто така имаат потреба од потасиум за да складираат јаглехидрати во форма на гликоген. Од некоја од претходните лекции сигурно веќе научивте колку се важни хидратацијата и гликогенот за endurance тркачите, а внесување на вода како да сте камила, само по себе не ви врши работа ако водата нема со што да се врзе и апсорбира (оваа лекција е тука некаде)

Да се вратам конечно на рецептот, кој е многу брз и едноставен.

во блендер

    Состојки:

• 2-3 јајца;
• 1-2 средни моркови;
• китка магдонос;
• сол и други зачини по вкус (јас додавам сув мелен ѓумбир и кари во се :))

Прв дел. Морковите исчистени, се варат. За да се сварат побрзо, исечкајте ги на помали кругчиња.

Втор дел: Откако ќе се сварат, ставете ги во блендер, заедно со магдоносот, јајцата и зачините. Во меѓувреме, намрсете ја тавата со маслиново масно, да се загрее додека вие блендирате. (За делот три Б, ќе треба да вклучите рерна на 200°С за да се загрее. Изберете една од двете опции, А или Б)во тава

Трет дел А: Откако тавата се загреала, а вие сте завршиле со блендирањето, намалете го огнот на потивко и ставете ја смесата од блендер во тавата се пржење. Пржете додека не зарумени и промешувајте.

печени
Трет дел Б: Овој дел е исти: откако тавата се загреала, а вие сте завршиле со блендирањето, намалете го огнот на потивко и ставете ја смесата од блендер во тавата се пржење. Откако ќе фати коричка од долната страна, префрлете ја тавата во претходно загреана рерна и печете на 200°С. Така, смесата ќе ви изгледа како палачинка.

јаца со моркови
Послужете со свеж зеленчук како домати, краставици или некоја листеста салата (марула, спанаќ…)

Добар апетит и лесни тренинзи

Permalink