Безглутенски Солени Мафини со железо и протеини

безглутенски солени мафини

Безглутенски Солени Мафини со железо и протеини

Овие солени мафини се одлични како мини закуска помеѓу оброци или непосредно по тренингот, но и за брзо послужување на вашите спортски пријатели. Брзо се приготвуваат, богати се со протеини и железо (железото најлесно се врзува со протеин и витамин Ц).

Потребно ви се само

♦јајца,

♦обарен спанаќ (коприва или друго листесто растение по избор),

♦малку зачини, сол и

♦малку маслиново масло

Количината која ќе ја употребите зависи од тоа колкава количина и густина сакате да добиете. Смесата најдобро да ви биде погуста.

во калап

Смесата од бледерот еднакво распоредете ја во сите калапчиња

Сите состојки изблендирајте ги заедно во блендер. Калапчињата за мафини фино премачкајте ги со масло за да не ви се залепи смесата, ќе имате проблем да ги извадите на крај од калапите. Смесата од бледерот еднакво распоредете ја во сите калапчиња, но не ги полнете до врв, бидејќи смесата ќе нарасне со печењето.

Печете во загреана рерна на 200-250°C околу 10-15мин., мирисот ќе ви каже кога се готови, но проверувајте ги повремено, за да не ви загорат.

*Совет плус: доколку сакате малку поголема густина и поспецифичен вкус, ви советувам да додадете и малку овесно брашно. Овесно брашно може да го најдете во супермаркетите, но јас ви препорачувам да си измелете сами, доколку сте во можност, така точно ќе знаете што внесувате. Купечките може да се мешани со други зрнести плодови, кои не се безглутенски. Тука имам детали за тоа како да си подготвите домашно овесно брашно.

Најдобро да ги послужите топли, со домашно кисело млеко, но и ладни се одлични, па може да ги подготвите од вечер и така да имате подготвено ужина за на работа.

Добар апетит!

Permalink