Како да се спакувам пред трка и што да понесам?

Најдобро е да ја искоритите саботата, односно денот пред трка и ментално да се подготвите за се она што сметате дека ќе ви биде потребно за денот на трка. Трката (во нашиот случај Скопски маратон) е рано наутро, па не сакате да бидете во брзање, нешто да не заборавите. Доколку не сте набавиле се од опремата која планирате да ја носите, не чекајте да последен момент, набавете ја порано, да имате време да ја пробате на тренинг и да видите да не имате проблеми, дали е комотна, дали ве фаќа некаде, дали ве гребе, дали е тесна/широка и сл.

Вечерта пред трка е најдобро да си спакувате или барем да ги ставите на едно место сите работи кои планирате да ги носите на трка.

Еве што јас би ви препорачала да внимавате да понесете, од моето искуство.

Почнете со најважните работи, без кои не можете да ја стартувате трката: опремата со која ќе трчате, дрес/маичка, патики, чорапи, стартно бројче и безопасни на него, капче и очила за сонце (ако носите), часовник, енергетски гел, течности, крем со заштитен фактор (за сончање). Значи прво подгответе го сето она без кое не можете да трчате трка, што и да е тоа за вас, не мора да е исто со она кое јас го предлагам.

Откако ги спакувавте основните работи, почнете да мислите на резервите, односно, со што ќе се загреам, дали ќе биде посвежо утрото пред трка, дали ќе земете тренерка или шишкавец, долги хеланки или до колена, или само шорцеви. Имајте ги сите опции на увид и уште подобро, во вашиот ранец, без разлика дали има 0 шанси за да биде ладно, понесете макар една тенка блуза со долги ракави – подобро да имате и да ја вратите, отколку да ја немате, а да ви треба.

 Друго, што ќе имате за пресоблекување после трка. Маичка и (за девојките) спортски градник, резервни шорцеви или хеланки/тренерки, што и да е што сметате дека вас би ви одговарало, но да имате нешто да се пресоблечете. Резервни чорапи, резервни патики, некои носат и резервна долна облека, па доколку сметате дека ќе ви треба да се пресоблечете по трка, понесете си. Пешкир или мало пешкирче за лице бидејќи ќе бидете “солени“ после трката, а тоа е од солта во потта, па ќе сакате да го исплакнете лицето за да не ве пече.

Добро, ја подготвивме гардеробата. Следно што би ви препорачала да си понесете е нешто за каснување по трка, како и освежување. Организаторите обично обезбедуваат вода, изотонични пијалоци, банана, сушено овошје и житарки на самиот финиш, но моја препорака е сето тоа да си го имате и вие со себе во вашиот ранец. Јас најчесто не знам каде сум во финиш, или едвај стојам на нозе и се што мислам е да седнам некаде под сенка и лад и да не се мрднам. Затоа и најчесто ги одминувам сите овие штандови на кои се послужува освежување. Плус, веднаш во финиш, освен вода, ништо друго не ти прима организмот, но по 10-20 минути, откако ќе се стабилизирате, дури тогаш почнувате да чувствувате што ви треба од храна. Затоа и ви препорачувам да си имате нешто за грицнување со себе како резерва.

Како да стигнете до стартот и како ќе се вратите дома? Испланирајте си го и ова однапред, проверете кои улици ќе бидат затворени. Доколку доаѓате со автомобил, размислете каде највеќе би ви одговарало да се паркирате, а да не заглавите на враќање. Доколку доаѓате со автобус, проверете каде ќе се движат автобусите, бидејќи некои булевари ќе бидат затворени до 14.00 часот.

Кога ќе се пакувате, потрудете се да сведете на минимум, иако јас не сум компетентна да ви зборувам за тоа – јас би носела и куфер да можам.

Што да НЕ носите, ако не морате. На сите интернационални маратони, организаторите советуваат да не носите вредни работи со себе, како лични документи, пасош, паричник и мобилен телефон. Доколку сепак е тоа нешто што сметате дека ќе ви треба, бидете внимателни каде ќе ги одложите работите. Генерално, местата/шаторите кои се обезбедени од организаторите за одлагање на личните работи за време на трка се безбедни, но сепак се работи за голема маса на учесници и публика, па секој си е одговорен за себе. Бидете внимателни со вредните работи и не носете повеќе од она што ви треба!

Смислете што ќе јадете утрото. За да не бидете во недоумица утрото пред трка, најдобро е уште од претходниот ден да си имате испланирано што е најдобро да јадете пред трка. Секако, под претпоставка дека за време на тренинзите во подготвителниот перод веќе сте востановиле што ви одговара на организмот, а не ви пречи при зголемен напор, односно трчање.

Секако за крај, внимателно проверете ги упатствата на официјалната страна на СКМ и водичот кој го добивате со стартниот пакет. Водичот не се дели само за реклама, туку да ви ги каже важните работи и инструкции кои треба да ги следите со цел да немате проблеми и недоумици за време, пред и по трката.

Од името на endurance.mk Тимот, ви посакуваме успешна трка.

Permalink