Ејуп Насер – Поранешен Рекордер Кој Нема Истрчано Ниту Една Сениорска Трка

И по завршувањето на Скопски Маратон, по селектирањето на импресиите и искуствата, ние продолжуваме со секцијата ’Обелоденување на историјата на македонската Атлетика’. Овој пат нашиот соработник, Миро Бошковиќ, ни испрати еден интересен текст за еден поранешен атлетичар, кој трчал до моментот додека не постанал сениор, а во младинските категории направил толку забележителни резултати, што и ден денес, тешко можат да бидат допрени.
За кого станува збор, прочитајте во продолжение.

’Кон крајот на 70-те и во 80-те години, во СЕТУ Михајло Пупин (порано Коце Металец) учеле или работеле голем број познати спортисти кои постигнале врвни резултати во својата богата спортска кариера. Уште во 1959 година, Нико Нестор, професор по физичко воспитување во училиштето, успеал да го преплива каналот Ла Манш. Фудбалерите Лазар Мојсов и Љубомир Рајчевски беа стандардни играчи на прволигашот ФК Вардар. Во 70-те години, како ученик, Шабан Сејдиу стана првак на Медитеранските игри во 1976 година, а на Олимписките игри во Москва 1980 и Лос Анџелес 1984 година освои бронзен медал. Силен печат во македонската кошарка и на меѓународен план, дале нашите поранешни ученици Војислав Зивчевиќ, Муса Амди и Синиша Аврамовски. На карате сцената се уште се актуелни  шампионите Аљоша Недев и Иво Цветковски. Во Тениската репрезентација на Македонија играле или сеуште играат Горан Шевченко, Васил Јотовски, Стефан Мицов. Во мечувањето, проф. Кирил Ристовски беше повеќекратен шампион на поранешна Југославија и на Балканот.

                Меѓутоа, не сум сигурен дека спортската и атлетската јавност знае дека во ова училиште учеле врвните атлетичари и рекордери на Македонија меѓу кои биле: Мачев Исмаил, Ејуп Насер, Илиевски Бранко, Дамчевски Тони, Aлиу Нехат, Дамчевски Тони, Тодоровски Зоран и Ќосев Роберт. Ги издвоив овие атлетичари бидејќи се наоѓале одн. сеуште се наоѓаат на листата на рекордери на Македонија. Според мислењето на голем број атлетски стручњаци, најголем успех постигнал атлетичарот Мачев Исмаил кој покрај своите рекорди упеа во штафетата 4х400 метри да го освои 4 место во 1991 година во Токио.

                Се надевам дека ќе имаме можност за сите нив нешто повеќе да кажеме. Овој пат би сакал да се навратиме на еден наш поранешен ученик кој како средношколец постигнуваше извонредни резултати, влезе во македонската репрезентација, беше рамноправен со своите конкуренти од другите југословенски простори, но кој немаше ниту еден настап во сениорска конкуренција. Се работи за Ејуп Насер.

Ејуп Насер е роден на 16.02.1960 година во Скопје. Уште како ученик во основното образование се истакнал како талентиран спортист, пред се атлетичар. Во тоа време се одржуваа масовни училишни кросеви на кои Ејуп Насер често победуваше. Покрај училишните кросеви, во во 70-те во Македонија се одржуваат РТВ кросеви на кои секогаш бил финалист и еден од надежите на македонската атлетика. Во 1975 година се запишува во Средното училиште “Коце Металец”, каде започнува систематски да се занимава со атлетиката. Најнапред беше член на АК “Работнички” а потоа преминува во новоформираниот АК “Скопје”.

насер1Ејуп Насер, прв од десно, во трката на 800 метри, 1978 г. Градски стадион

Во почетокот на својата атлетска кариера, Насер настапуваше во спринтерските дисциплини како и на 110 пречки и 400 пречки. Неговите извонредни атлетски предиспозиции дојдоа до израз особено  во дисциплината 110 пречки. Во тоа време, ретко кој од атлетичарите се посветуваше на оваа техничка дисциплина. Пред него, најдобрите натпреварувачи во оваа дисциплина беа Вељко Брајовиќ, Васил Миновски, Терзиев Перо, Раде Јовчевски и др. И еве сега, во 1977 година, во оваа дисциплина со резултат 18,4 станува рекордер на Македонија во категоријата  млади јуниори. Покрај оваа дисциплина, настапува и во дисциплините  300 метри пречки и 400 метри пречки. Во истата година, во Бања Лука поставува рекорд и на 300 метри пречки  со резултат  44,3.

Најголемите успеси, Насер ги постигнува во дисциплината 400 пречки. Заправо, тој ги поседуваше сите елементи неопходни за постигнување на врвни резултати во оваа мошне напорна дисциплина: брзина, височина, скочност, издржливост и храброст. Во текот а 1977, 1978 и 1979 година, Насер неколку пати поставува рекорд на Македонија. Најнапред во 1977 година, на Купот на републиките и покраините во Љубљана, оваа дисциплина ја истрчал за 1,03. Уште подобар резултат Насер постигна на финалето на Купот на Југославија кога го освои II место со извонреден разултат и нов јуниорски рекорд на Македонија од  56,06.

Во 1978 година поклонува поголемо внимание и на трките на 110 пречки. На возраст од 18 години, на 110 метри со пречки постигнува резултат 15,09 и нов македонски рекорд за постари јуниори. Во 1979 година, успеа да влезе во финалето на Купот на Југославија на 400 метри пречки. Тогаш истрча извонредна трка освојувајќи го IV место и нов македонски рекорд од 56,03. Година дена подоцна овој рекорд беше соборен од неговиот клупски другар Бранко Илиевски  кој во Загреб истрча  55,11. Овој резултат е се уште рекорд на Македонија за постари младинци на званичната листа на рекорди.

насер2Ејуп Насер со репрезентацијата на Македонија, 1978 год. (средина, горе)

Ејуп Насер беше мошне успешен и во другите дисциплини. За својот клуб често настапуваше и на 400 и 800 метри. Неговиот  најдобар резултат на 400 метри изнесува 50,09 а трката ја истрчал во 1978 година во Нова Горица. Колку извонреди атлетичари имаше  во македонската атлетика во тие година, кажува фактот што штафетата на 4х400 метри во состав Ејуп Насер,  Исмаил Мачев, Сачевски Сокол и Џиханша Неби,  на 15.07.1979 година постави нов македонски рекорд на Македонија. Инаку, Ејуп Насер за репрезентацијата на Македонија трчал повеќе од 40 трки. Во периодот на отслужувањето на воениот рок во Карловац во слободно време тренираше и се подготвуваше за армиското првенство. Во дисциплината на 400 метри стана и армиски првак, уште еднаш потврдувајќи го својот неоспорен талент.

По завршувањето на воениот рок, кога се врати во Скопје, кога ние во атлетиката очекувавме од него да ја продолжи кариерата и да поставува нови рекорди, Ејуп Насер престана активно да се занимава со атлетиката. Тој е само еден од низата таленти кои прерано ја напуштиле а тлетиката. И сега, ако ги простудираме неговите резултати, можеме да заклучиме дека сето тоа што го постигнал, го направил како јуниор. Како сениор,  нема истрчано ниту една трка, освен што настапуваше во трки од рекреативан карактер.

Со Ејуп Насер се гледам почесто. И покрај тоа што не живееме повеќе таму, Старата скопска чаршија ни останала во незаборавни сеќавања. Се случува токму во тој дел од градот да се сретнеме, и во некоја од чајџилниците да седнеме и со чај да дискутираме за атлетиката. Импресивно е колку многу ја сака и познава атлетиката. И покрај тоа што како активен атлетичар останал само четири години, мошне добро се сеќава на сокој настап, како во Македонија, така и надвор од неа, а својата документација и статистика и денес грливо ја чува. Љубовта кон атлетиката успешно ја пренесуваше кон синот и ќерката кои подолго време тренираа и се натпреваруваа на атлетските натпревари во Македонија. Насер е сега туристички водич и своите знаења и гостопримството го пренесува на туристите кои го посетуваат нашиот град и Република Македонија.’

насер ејуп1

 

Пишува:

Мирослав Бошковиќ

 

Permalink