Кенениса Бекеле, Берлин Маратон И Нешто Повеќе

Тоа нешто повеќе е нешто што не можете да го сретнете по комерцијалните сајтови, но затоа не имате нас, за по некоја инсајдерска информација поврзана со Kenenisa Bekele. Да бидам поконкретен, за неговиот ривал, Wilson Kipsang можам да објавам повеќе инсајдерски информации во наредниот текст, затоа што условно ми беше најдобар пријател на два дена, пред две години, како промотор на Скопски Маратон, па имав несекојдневна прилика да разговарам и разговарам и разговарам со него. Со К.Бекеле не сум имал никогаш прилика ниту да се фотографирам, а уште помалку да се запознаам, но сепак, доволно ја следам неговата кариера и запознаен сум со неговите актуелни случувања и статус.

Сега она што сакаме да го дознаеме за Бекеле К. е што се случува моментално со него? Тој во неделата истрча неверојатни 2:03:03 за победа на Берлин Маратон! Го собори стариот Национален рекорд на легендарниот Haile Gebrsellassie (2:03:59). Каде е тој моментално и што му се случуваше? Малку ретроспектива: Бекеле не ја прекина официјално тркачката кариера на стаза, но полека се дистанцираше и се пренасочи на најтешката атлетска дисциплина – Маратон. Тој има до сега тру до некаде успешни Маратони, но сепак не во полн сјај како што му доликува на целиот негов профил и историјат. Бекеле победи во Париз пред две години со 2:05:04, беше четвртопласиран на Чикаго Маратон истата година, со 2:05:51 и наредната пролет не успеа да го финишира Дубаи Маратон. Се врати на Лондон Маратон оваа година, со трето место, со одлични 2:06:36.dbba6258-aab7-45db-a0ee-d9d0003c46a8

Зошто одлични кога тој има два подобри резултати од овој? Ако го знаете доволно неговиот историјат, нема ни да поверувате зошто велам одлични. Откажувањето на Дубаи Маратон беше токму заради таа една иста причина: повреда на Ахиловата тетива. Иако ’со глава во зид’ се обидуваше да се врати, сепак, против повреда, а особено против оваа најтешка спортска повреда, не успеа. Со многу консултации, со врвни светски физиотерапевти, не успеваше да ја залечи повредата и конечно се најде врвен тим од Ирска кои успеаа полека полека да го враќаат на нозе.

Во тоа време тренираше со светски признатиот тренер, италијанецот Ренато Канова. Според неговите сведоштва, Бекеле паузирал КОМПЛЕТНО од трчање цели 11 месеца. Се вратил 2 месеца на тренинг, непосредно пред Лондон Маратон. Ете зошто е толку импресивен тој резултат – 2:06. А кој би рекол? Кенениса Бекеле е дефинитивно човек еден во милијарда. Тој е дедициран да победува, да поставува рекорди и да биде GOAT (greatest of all time). Тој имаше неколку неуспешни враќања на 5000 и 10.000м, не беше избран во селекцијата на Етиопија за ЛОИ во Рио и токму сега докажа дека тоа им беше огромна грешка на Етиопија.

Што може да се очекува од Бекеле? Да го нападне повторно Светскиот Рекорд во Маратон (2:02:57 – Денис Кимето, Кенија) и да го прегази, да трча на Светското Првенство наредна година во Лондон, но и да трча на наредните ЛОИ во Токио, кога ќе има 38 години. Што да не. Од она што се очекува од него е дека е способен да истрча Маратон 2:02:30, во дадени перфектни амбиентални услови, одлични пејсмејкери и идеална стаза (Берлин или Ајндховен или Ротердам). Бекеле го имаше најбрзиот премин на Полумаратон, на Маратонот во Берлин (1:01:11), најбрзите 30км и најбрзото затворање од 40ти км до финиш. Последните 2км ги затвори за 2:49 / 2:47 back to back! Просечниот ритам на Светскиот рекорд е 2:54.8, а и неговиот во неделата беше тука негде. Тој може и многу повеќе. вели дека е во 80-90% подготвеност. Којзнае …

Останува да се запрашаме дали можеме да го очекуваме најлутиот Маратон на сите времиња, со главните улоги кои би ги играле следниве: Eliud Kipchoge, Kenenisa Bekele, Dennis Kimmeto и Wilson Kipsang. Каква битка би било тоа. Овој Берлински Маратон беше нешто што дефинитивно му треба на нашиот спорт – луто ривалство до самиот финиш. Ваква трка последна беше видена на Лондонскиот Маратон и пред 5-6 години на Чикаго Маратон, дуелот помеѓу Sammy Wanjiru и Tsegay Kebede.

Во наредната епизода ќе навлеземе подлабоко во профилот на Wilson Kipsang и она што можев да го чујам, видам и научам од него, за време на неговиот престој во Скопје, по повод Скопски Маратон. Останете тука.

Permalink