Штафетна Трка ПОДАЈ РАКА 2016

Оваа година, организаторите на трката од Здружението на граѓани за поддршка на лица со ретка болест Вилсон – Македонија ќе ја организираат втората традиционална штафетна трка, а ние како endurance.mk тим ќе бидеме активен дел од оваа прекрасна хуманитарна акција.

*До сите заинтересирани членови на нашиот тим и сите кои не се дел од endurance.mk, а сакате да бидете дел од оваа хуманитарна штафетна трка, слободно обратете ни се на endurancemkproject@gmail.com, ќе формираме тим, а доколку имаме повеќе од еден тим (еден тим = 4-ца тркачи), тогаш ќе направиме повеќе тимови, пр.: endurance.mk Тим 1; endurance.mk Тим 2…

(*податоците за трката во продолжение се превземени од https://www.smartrace.club/

, на истиот линк може да најдете повеќе информации или на нивниот Facebook настан.)

Настан ПОДАЈ РАКА 2016
Датум 15.10.2016
Почеток 11:00
Локација Кеј – Градски Парк, во близина на Х. Александар Палас, Скопје
Организатор Здружение на граѓани за поддршка на лица со ретка болест Вилсон Македонија
Контакт wilson.macedonia@gmail.com

Опис на настанот

Здружението на граѓани за поддршка на лица со ретка болест Вилсон – Македонија со второто издание на хуманитарната штафетна трка ПОДАЈ РАКА 2016, се вклучува во обележувањето на денот на Вилсоновата болест на глобално ниво, со која симболично ќе покажеме дека заедно можеме да постигнеме повеќе за подобрување на квалитетот на живот на овие лица во Македонија.

Целта на овој настан е да ја подигнеме свеста на јавноста за Вилсоновата болест, да ја поттикнеме социјална вклученост на лицата кои се соочуваат со оваа болест, како и да поттикнеме што повеќе луѓе на рекреација и подобрување на нивната општа психофизичка состојба.

Премиерното издание, Подај Рака 2015, имаше цел да ја запознае јавноста со предизвиците со кои се соочуваат пациентите со ретки болести, а со тоа и Вилсоновата болест, како и собирање средства за набавка на реагенси за рана детекција и следење на болеста. Горди сме што заедно со несебичната помош и подршка на хуманите луѓе и општествено-одговорните компании успеавме во напорите за запознавање на поширок круг на луѓе со Вилсоновата болест, симптомите, начинот на манифестација и третман, како и во подигнувањето на свеста кај медицинскиот кадар за постоењето и на ваква ретка болест. Индикативен показател е што само за последната година 5 нови случаи на заболени од Вилсонова болест се дијагностицирани и ставени на терапија. За жал, и во изминатата година згасна еден детски сон со постхумна дијагноза – Вилсонова болест.

Целта на второто издание на хуманитарната акција е собирање средства за основање регионален центар за поддршка.
Во недостиг од искуство и поддршка во својата земја, на пациентите и нивните семејства од исклучителна важност им е поврзувањето со други луѓе засегнати од оваа болест, како би ги добиле потребните информации и совети за справувањето со предизвиците кои ги носи болеста. На медицинскиот персонал, пак, поврзувањето со стручни лица од регионот би овозможило достап до поголеми бази на податоци, корисна литература, можност за стручни консултации и практични совети за дијагностицирање и третман на Вилсоновата болест.

Со овој настан сакаме да им дадеме поддршка на сите лица кај кои најчесто како последица на ненавремена детекција, ретките болести оставиле непоправливи последици, како и да им оддадеме почит на оние кои прерано го изгубиле својот живот борејќи се со нив.

Трки

Второто издание на хуманитарната штафетна трка (4 х 1000 метри) е планирано за 15.10.2016 (Сабота), на кејот на реката Вардар – Скопје, во билизина на мостот на Вардар кај Хотел Александар Палас.
Трката има и симболичен натпреварувачки карактер во следните категории:

  • – Семејство и пријатели
  • – Корпоративни тимови

Во рамките на настанот ќе се организира и детска штафетна трка на 7 минути за деца до 12 години.
Пријавувањето за детската трка ќе биде на лице место. Учеството е бесплатно. Пропозиции

  • Секој тим брои до 4 учесници и може да е мешан – машки и женски
  • Секој тим треба да измине 4 должини (кругови) од 1000 метри
  • Првиот натпреварувач од тимот на старт добива штафетна палка. Со палката треба да измине 1 круг (1000 м.) и да ја предаде на следниот натпреварувач.
  • Последниот натпреварувач треба да ја донесе штфетната палка на целта.
  • подај рака

За учество во трката нема старосни ограничувања. Секој учесник учествува на сопствена одговорност.

Котизација

Цената за регистрација за штафетната трка 4х1000м изнесува 600 денари по тим.
Учесниците во штафетната трка, по пријавувањето, може да изберат дополнително да купат и маичка со лого на настанот, по цена од 200 денари по учесник.

Заинтересираните кои не се во можност да трчаат, а сакаат да ја дадат поддшката за ПОДАЈ РАКА 2016, може да го изберат индивидуалниот пакет Маица + Активна поддршка по цена од 200 денари.
Со една нарачка може да се нарачаат пакети за повеќе учесници.

Стартни пакети

Стартните пакети ќе се подигнуваат на денот на трката, во близина на стартот, од 10:00 до 11:00.

Лицата со ретки болести имаат право да не бидат невидливи во општеството. ПОДАЈ РАКА !

Permalink