Поранешниот Светски Рекордер Во Маратон – Wilson Kipsang, Одблизу. Ексклузивно Приближување На Овој Великан

За почеток, кои од најкрупните работи го идентификуваат Wilson Kipsang:

– Светски рекордер во Маратон (поранешен) – 2:03:23 – Берлин Маратон, 2013
– бронзен медал на ОИ Лондон, 2012 – 2:09:37
– 6 пати истрчан Маратон под 2:05 (единствен во светот за сега)
– 3 пати истрчан Маратон под 2:04 (единствен во светот за сега)
– 2:03:13 – најдобар резултат на Маратон, трет резултат во Светот на сите времиња
– 58:59 – најдобар резултат во Полумаратон
– пласмани во топ 3 и резултати во прилог:

2010 Abu Dhabi Half Marathon Abu Dhabi, UAE 1st 1:00:04
Paris Marathon Paris, France 3rd 2:07:13
Frankfurt Marathon Frankfurt, Germany 1st 2:04:57 CR
2011 Zwolle Half Marathon Zwolle, Netherlands 1st 1:00:49
Lake Biwa Marathon Otsu, Japan 1st 2:06:13 CR
Frankfurt Marathon Frankfurt, Germany 1st 2:03:42 CR
2012 London Marathon London, UK 1st 2:04:44
Great North Run Newcastle, UK 1st 59:06
Honolulu Marathon Hawaii, USA 1st 2:12:31
2013 NYC Half Marathon New York, USA 1st 1:01:02
Berlin Marathon Berlin, Germany 1st 2:03:23 WR
2014 London Marathon London, UK 1st 2:04:29 CR
NYC Marathon New York, USA 1st 2:10:59
2015 London Marathon London, UK 2nd 2:04:47
2016 London Marathon London, UK 5th 2:07:52
Berlin Marathon Berlin, Germany 2nd 2:03:13

Но ова е нешто што можете да го прочитате и на интернет. Тоа што имам да ви го пренесам, не можете да го најдете на ниту еден портал. Тоа е нешто најексклузивно и јас ја имав таа огромна среќа да го доживеам тоа одблизу пред две години, на Скопски Маратон 2014, кога тогашниот Светски Рекордер во маратон, Wilson Kipsang беше специјален гостин и промотор на СКМ. wk3Ја имав таа посебна, најверојатно и единствена once-in-a-life-time прилика да се запознаам со ваков великан како Kipsang, со ваков светски калибар, да бидам негов и тој мој најдобар другар на два дена и во тие моменти колку што имав прилика да разговарам со него, да успеам да научам без малку и животни лекции и да најдам одговори на некои прашања за кои најверојатно целиот живот би си ги поставувал и никогаш нема да би нашол одговор или би се темелеле на некои текстови со сомнителна содржина, најдени наваму-натаму.

Дел од овие приказни и анегдоти со Kipsang сум ги раскажувал на некои мои блиски луѓе, но забележувам дека се повеќе луѓе почнуваат да не следат на endurance.mk, дека се повеќе луѓе вистински го засакуваат трчањето, а јас сум човек кој несебично сакам да го споделам своето искуство, моите скапо платени лекции, кои за жал забележувам дека многу малку ги прифаќаат и учат. Сепак, нивна работа. Јас не сум продавач на велнес тревки и вртипоп. Јас продавам знаење, искуство и мотив плус. Порано или подоцна луѓето ќе го сфатат мојот искрен однос.

Kipsang тогаш беше во придружба на еден од неговите менаџери, холанѓанецот Ариан Веркаде. Уште вечерта, односно веќе ситни часови по полноќ, Кире, Директорот на СКМ ме запраша дали би сакал да го дружам до аеродром, за да ги пречекаме. Одговорот не треба да го пренесувам. Договоривме веднаш тренинг во 7:00ч изутрина. Иако не практикувам тренинг на ден пред Маратон, тоа беше една и единствена и неповторлива прилика да направам тренинг со тогашниот Светски рекордер во Маратон. Но ме заплашуваше што значи неговото лесно истрчување. Рече 10тина километри, на околу 5мин/км ритам. Да, добро читате, Светскиот рекордер истрчува на околу 5мин/км. Не на 4, не на 3:30/км. Ако сеуште не сте почнале, почнете да фаќате прибелешки.
Сепак, тренингот не се случи. Имав само неколку часа само да преспијам и станав во 6, за во 7:00 да бидам во хотелот каде престојуваа Кипсанг и Веркаде. Иако 15тина минута тропав на вратата како мрднат, наводно да го разбудам Кипсанг, сепак се испостави дека тој веќе станал и заминал на тренинг. Не ни сакам да навлегувам во причините зошто тој ми закажа тренинг, а замина пред јас да дојдам. Тој е светски гигант, несопирлива машина, глобален ас и јас немам апсолутно никакво право ниту да се лутам, ниту да прашувам.

Одиме понатаму. Заминавме на посета кај Градоначалникот на Скопје. wk4Многу фоторепортери наоколу. Нема да навлегувам во содржината на разговорот што го имаше во салата на состаноци, затоа што и не ми беше искрено ништо интересна. Класика прашања и класика одговори. Тоа што ми беше интересно беше разговорот со него и Веркаде, додека чекавме пред состанокот. (ќе се обидам да постирам и фотка и разговорот пред состанокот). Таа година, во Април месец, на околу еден месец пред СКМ, се одржа Бостон Маратон. Победи американецот Meb Keflezighi. Иако пред него имаше 17 други фаворити од цела Африка, со на хартија подобри резултати. Меѓу нив беше и Dennis Kimmeto, актуелниот СР сега. Го запрашав Веркаде како токму американец успеа да победи во Бостон. И тоа токму на денот на независноста на САД, на година после бомбашките напади на Бостон Маратон. Професионално дипломатски ми го избегна одговорот, иако забележа дека јас не сум само обичен Маратонец, со просечни резултати. Јас сум многу повеќе од само Атлетика. Кипсанг пак не така професионално, не знаеше да изреагира како Веркаде и почна да се смее, но не ми го даде одговорот. Сепак јас го знам одговорот, а тие двајца останаа да се запрашуваат од каде некое момче во оваа земја, каде Атлетиката е на толку ниско ниво, толку длабински ја следи и анализира атлетската тематика.

Продолживме понатаму на детската трка на СКМ, на плоштад, па на специјално интервју за МТВ, на кровот на Лумикс пред ГТЦ, па понатаму на ручек во еден ексклузивен италијански ресторан. Во меѓувреме јас буквално го оптоварив со милион прашања околу неговото тренирање, храна, живот, фамилија, бизнис, образование и се што ми падна на памет. Едно од интересните прашање се сеќавам ми беше околу long run тренинзите. Во смисла што тој практикува и препорачува. Рече дека тоа за него претставува некаде до 36-38км, но рече иди ги тие километри не толку лесно, затоа што со премногу лесно и не им правиш баш некоја услуга на нозете. Се утепуваат нозете така. Малку убрзај ги рече, на околу 3:20/км! 3:20/км му реков е ритам за Олимписка норма во Маратон, дали е свесен? Ми рече ’Олимписка норма? А колку е таа?’. Ете толку им значи Олимписката норма на кенијците, а исто толку им значат бодовите по IAAF таблицата.wk2

За ручек нарачавме некои тестенини, со некој сос од некоја туна. Имавме сличен ручек со Кипсанг. Не дека го копирав, но тестенини се секогаш убав избор за маратонците. Секако дека маратонски ’животни’ не можат да не најаде порција тестенини и тргнав по дополнително појачување. Рече и тој дека сака екстра храна. Му реков јас ќе нарачам Цезар салат. Тој рече дека истото и за него, иако не знае што е тоа. Му реков сите состојки се супер, освен тоа што има одозгора и прелив од мајонез. Некако чудно ме погледна и ме запраша ’па што?’. Ок, мислев … не мислев ништо да бидам искрен. Маратонците се машинерија, печка што согорува се и сешто!

Тука свртевме супер содржајни разговори. Меѓу останатото, го запрашав што го мотивира понатаму, кога знае дека е Светски рекордер во најтешката дисциплина. Се насмеа. Се насмеа затоа што знаеше што се прави во Кенија. Го прашав што мисли за Dennis Kimmeto. Му реков дека тој е сериозен претндент за нов Светски рекордер. Се насмеа и рече – замисли го делам мислењето. Исто рече и Веркаде. А што мислиш за Eliud Kipchoge? – го запрашав. Рече исклучително јак маратонец, иако мислам дека малку доцна влезе во маратонскиот свет. Замислете, и едниот и другиот се лидери во светското маратонство! Не сум никаков пророк, но сум ненормален фанатик, аналитичар, статистичар, логичар и се што е поврзано се домашната и светската Атлетика. Kimmeto таа година есента, стана Светски рекордер. Кипсанг тоа го намириса, а го намирисав и јас. Кипчоге е веќе две години прогласуван за најдобар Маратонец според AIMS.

Вечерта бевме на вечера во еден ресторан на Кеј 13ти Ноември. Таму го пречекаа една група трчачки ентузијасти и вљубеници на трчањето. Дел од нив уште се во трчањето, затоа што по се изгледа биле вистински вљубеници. Тие другите само се сликаат. Веќе бев страшно преморен, но вечера со Рекордерот не се пропушта. Тој јадеше некоја фина вешалица со помфрит и нарача дополнително кечап. Се напи и едно винце. И Светските рекордери пијат вино. Свртевме неколку реда интересни муабети. Малку се мајтапеше со мене на тема љубов, па низ шала рече дека љубовта на мојот живот ќе биде некоја трчачка личност. И се случи. Кипсанг за кум! … на второто дете .

Инаку Кипсанг е сопственик на ресорт хотел во Елдорет, исклучително интелигентен човек, со големо образование позади него, со ентузијазам, жена и три деца и голема идеологија. Наредниот ден на Сопскиот Маратон, јас и Весна финиширавме како нови Национални шампиони. Кипсанг низ шала рече дека до тогаш немал видено брат и сестра Национални шампиони. Ете сега не има и нас како пријатели, двајца национални шампиони, брат и сестра.

Има уште многу други моменти кои ќе ги паметам од другарувањето на овој голем човек, но пред се голем спортист. Но ќе ги раскажам во некоја друга прилика. Доколку се најдеме заедно на некој муабет, секако дека ќе ви ги пренесам. Има и некои tips and tricks кои тој ми ги пренесе, но сепак ќе ги оставам за себе 🙂

До наредна средба, останете во добро расположение и тренирајте паметно.

Permalink