Ла Тана Е Во Куќата, Маратонците Се Во Куќата На Ла Тана

После цели 18 години во Атлетиката или да не бидам толку опсежен, после 4 години на врвот во Маратонското трчање во Македонија, конечно во мојата кариера влезе едно еминентно име во светот на угостителството, гостилница Ла Тана. Сите сме свесни колку е потребен влог за еден Маратонец да постигне високи резултати. Особено колку исхраната ја одигрува важната роља во регенеративниот процес кај Маратонците.

За соработката е виновен еден мој одличен пријател, endurance тркач, Кико Ристовски. Свесни дека Атлетиката е на најниското можно ниво во редот на спортовите во државата, секако дека очекувано е најдобрите Маратонци никој и да не ги познава. Секако голема благодарност и на новинари што толку многу не промовираат. НЕ!
Кико во стилот на вистински менаџер, но пред се човек кој безусловно сака да помогне на луѓето околу себе, особено на спортистите, ме конектираше со газдата на Ла Тана и понатамошен муабет и не беше доволен.

Храната која ја консумирам на дневно ниво е од највисок квалитет и по кујната на мојата сопруга (претходно на мојата мајка), ова е уште една многу важна карика во постигнување на високи резултати. Во Маратоните не постои скратен пат. Секој детал е важен, а најважна е трпеливоста. Сум повторил многу пати, тренажниот процес, структурираната работа и пристап, се тие што ќе не доведат до повисоко ниво на фитнес, но без соодветна исхрана, соодветна опрема и професионални тренери и физиолози, слагалицата на Маратонството би била некомплетна. Тоа го знае и практикува и мојата сестра Весна и не случајно е Национален Рекордер во 3 дисциплини во Македонија.

За целокупниот континуиран напредок, е најмногу виновен нашиот тренер Методија Ќертаков и нашиот физиолог Проф. Д-р. Метин Далип, кои се воедно и научници. Тие знаат што точно, во колкава мера, дозирано, премерено, искалкулирано треба да направиме, а исхраната е секако дел на кој обрнуваат многу внимание. Со ваков тим, без разлика на игнорантноста од институциите во државава, убеден сум дека можеме уште многу да напреднеме. Постојат уште многу неотворени врати.

Спортски поздрав до сите добронамерни луѓе!

Permalink