Scarlet Runner Гравчиња

Гравчињава од сликата ги видов денес споделени на пост кај другар ми Jamie Oliver. Немаше опис што сорта се, како се викаат или други детали освен дека сам си ги одгледува (нормално), па се расчитав на Гугл само затоа што ми се допадна структурата на нивната боја, па ако ги има кај нас можам да си направам некои аксесори со нив. Не дека не сум љубител на грав, ама не сечиј стомак го вари, а мојот очигледно е еден од тие.

И ги најдов на нет. Се викаат Scarlet Runner. Во превод, за оние кои не се по англискиот, значи Црвен Трчач. Значи, не само што имаат кул боја, туку во името го содржат зборот тркач. Јако нели?

Тоа ме навлече подетално да се расчитам за потеклото на името, каде растат, нутритивна вредност и сл. и сфатив дека приказната вреди да се сподели со атлетската/трчачка публика.

Scarlet Runner гравчињата своето трчачко име го добиле затоа што кога растат нагоре тие користат потпора, стебла, дрва, ограда за да се искачат нагоре, па одгледувачите нормално, не ги крстиле качувачи, туку трчачи. Другата половина од името (Scarlet) го добиле поради жар црвената боја на нивните цветови која е многу впечатлива.

Нутритивна факти: за атлетската/трчачка маса интересно е да споменам дека имаат богат и високо хранлив состав. Како и секој вид на грав, тие се богати со протеини. Покрај тоа, имаат висок процент на хаглехидрати и мал процент на здрави масти. Од витамините, најбогати се со витамин Б6, Б1, Б2, а од минералите богати се со железо, магнезиум, цинк, потасиум, калциум.

Во една порција (150гр.) содржат висок процент на растителни влакна (40.05гр.)

Кога е најдобро да се консумира: овој тип на протеинска храна е најдобро да се јаде по напорен тренинг, должина или трка (полу/маратон). Истражувањата имаат покажано дека консумирање на малку протеини со јаглехидрати може да го забрза процесот на опоравок (рикавери).

Пишете ни коментар на социјалните мрежи доколку сте сретнале Црвен трчач гравчиња како овие, а во меѓувреме, навалете на старото добро традиционално македонско тавче гравче.

Добар апетит!

 

Permalink