Нов Голем Проект На Endurance.mk – Научно Истражување, Тестови На Лактатен Праг

Endurance.mk тимот продолжува со големите проекти, односно научни истражувања, кои даваат одредени показатели и параметри и непобитни факти во трчањето, поврзани пред се со физиолошките промени во нашиот организам при перформирање, а кои без Науката не би можеле да ги осознаеме, односно идентификуваме и утврдиме.

(*за тоа што е Тест на Лактатен Праг и како се одвива, ви имаме зборувано порано, потсетете се тука)

Велат стариот тим што победува, не се менува. Па така составот е ист, континентите се сеуште различни, но синергијата движи напред. Нашиот физиолог и пред се признаен Професор Д-р. Метин Далип, како главен реализатор на научното истражување е повторно во игра. Нашиот тренер кој моментално е на докторски науки во Мелбурн, Австралија, Методија Ќертаков како клучен координатор на процесите и нашата најдобра атлетичарка на средни и долги патеки, тројната рекордерка, Весна Кираџиева во улога на асистент на двајцата истражувачи. Јас сум некаде измеѓу сите нив.

Овој пат ќе се прават тестови на лактатен праг, тестови кои секој оној кој би посакал да ги прави сам за себе, би чинеле околу 150 евра во напата земја. Ваквите тестови се прават многу често кај професионалните маратонци од другите земји, но кај нас, пред се заради дефицит на стручни лица, но и секако недоволно финансии, се прават многу ретко, односно поточно кажано никогаш.
Па така, ова ќе биде вистинска можност од една страна да се направи големо научно истражување, во кое ќе учествуваат наши distance тркачи, а од друга страна тие тркачи ќе добијат резултати, односно индикатори за нивната актуелна форма и за тоа во кој правец би требало да ја движат и модифицираат формата.

За учество во ова научно истражување ќе бидат земени 20, а можеби и нешто повеќе испитаници, а учесници ќе бидат членовите од најдобрите distance тимови во Македонија: AC Fusion, MC running Team и секако нашиот тим како секогаш главен иницијатор и покровител на ваквите проекти – Endurance.mk. Ќе има уште неколку други учесници надвор од овие три тима, но секако тука се бара дисциплина, примерност, позитивизам, приземност и пред се ентузијазам, па затоа одлучивме привилегија за учество во овој проект да имаат тркачите од овие тимови.

Тестовите ќе се одвиваат во фитнес центарот Fitness Park (Park Hotel & Spa), а ќе започне на 14 Ноември и ќе трае се до крајот на оваа година, а доколку пречекори, продолжуваме и во новата година. Дневно ќе се тестираат 2-3 испитаника, а една сесија е предвидена да трае околу 40-45 минути. Испитаниците ќе имаат минумим 5 сесии (теста), а оние клучните тестови ќе бидат тестот на Конкони и тестот на лактатен праг.
За успешно реализирање на сесиите, како и пред се за релевантни податоци, од испитаниците се бара да ги почитуваат правилата на тестирање, односно на самиот ден да немаат тренирано, а претходниот ден да немаат високо интензивен тренинг. Односно со други зборови, да бидат одморени и подготвени за тестирање.

За тоа како отприлика изгледаат тестовите кои и сега малтене ќе се одвиваат по ист протокол, погледнете во следното видео и во видеото погоре:

Permalink