Триото близначки Луик од Естонија на Скопски маратон

Веројатно повеќето од вас, атлетско/маратонски фанатици веќе знаете за новините кои предновогодишно со нас ги споделија Скопски маратон. Споделивме и ние – по покана на екипата од СКМ, на гости во Скопје доаѓаат триото близначки од Естонија Leila, Liina и Lily Luik.

Зошто се интересни за јавноста, ви имаме пишувано и порано. Оние кои активно не следите на нашата фан страна на фб и тука на нашиот официјален сајт знаете, останатите може да проверите тука и тука.

Леила, Лина и Лили (родени  1985г.) се првото трио близнаци кои во историјата на Олимпизмот се имаат квалификувано и учествувано на Олимпијада (летна или зимска).

Трите ја исполнија нормата за учество на маратонската трка на ОИ во Рио. Последна во низата влезе Leila Luik на која се чекаше да ја исполни нормата на маратонот во Хамбург (истрча 2Ч:42), бидејќи нејзините две сестри близначки веќе имаа истрчано под олимписката нормата од 2:45. Тие три се воедно и единствените три девојки од Естонија кои имаа исполнето норма за Олимпискиот маратон во Рио.

Најдобри лични постигнувања во маратон:

Леила: 2:37.11;

Лина:  2:39.42;

Лили:  2:40:30

Леила, Лина и Лили

Леила, Лина и Лили

Коинциденција или не, редоследот на тоа која има најдобар резултат во кариерата соодветствува со редоследот по кој се родени.

За себе велат дека си се подршка и мотивација на тренинзите, добиваат енергија една од друга. Никоја не сака да биде последна и најспора, па секоја гази и притиска.

Иако се близначки, секоја има своја конституција и физички предиспозиции, кислороден капацитет и потребно време за рикавери (опоравување). Тоа најдобро го знае нивниот тренер Lemberg, кој знае дека иако навидум близнаците делуваат исто, секоја е индивуда сама за себе и така мора да се пристапува во тренажниот процес. Тој вели дека исто така се консултира и со еден од најпопуларните тренерски имиња Renato Canova, (кој освен што е популарен како тренер на Светски и Олимписки шампиони од Кенија, исто така е тренер и на германските маратонки-близначки, Anna и Lisa Hahner).

Тренерот Лемберг вели дека често ги одвојува на тренинзите една од друга, бидејќи кога се заедно, се потпираат една на друга, сметајќи на тоа дека сестрите ќе бидат тука за помош, додека кога си оставени сами на себе, не очекуваат помош и се покомпетитивни.

И покрај тоа што подоцна имаат почнато да се занимаваат со атлетика и маратонско трчање (на 24-години), тие се вистинска инспирација за една мала земја како Естонија, која нема некоја впечатлива традиција на маратонско трчање, а особено не во категорија кај дамите. Доказ за тоа се и неверојатнот број од 10.000 учеснички на женската трка во должина од 7км која се одржа во Талин порано годинава.

Да се надеваме дека нивното присуство на Скопски маратон ќе биде толку мотивационо и за дамите од Македонија да почнат помасовно да учествуваат на трките и рекреативно да тренираат и трчаат, бидејќи овие девојки се доказ дека никогаш не е предоцна да се стартува или да се напредува и постигне врвен успех!

Пријавувањата за Скопски маратон се во тек, за сите информации проверете на нивниот официјален сајт.

 

Permalink