Застанете За Момент, Овде Се Пишува Историја – НОВ СВЕТСКИ РЕКОРД Во Полумаратон (65:06), Peres Jepchirchir

23-годишната Кенијка, Peres Jepchirchir, која минатата година, на Светското првенство во Полумаратон, во Кардиф постана Светски Првак, со фантастичен резултат во финишот (1:07), денес утрово на својата актуелна титула ја додаде и најголемата можна титула во светот – Светски Рекордер. Таа на престижниот Полумаратон во Обединетите Арапски Емирати (ОАЕ), поточно во градот Ras Al Khaimah, на истоимениот Полумаратон (RAK Half Marathon) истрча сензационални 65:06, што е за 3 секунди подобро од претходниот СР истрчан на Полумаратон во Барселона, 2015, резултат кој го истрча кенијката Florence Kiplagat, која меѓудругото на два пати го соборуваше Светскиот рекорд.

Прво: секоја чест за организацијата на RAK Half Marathon! Тие обезбедија толку многу средства, ги привлекоа најголемите светски имиња и загарантираа толку голем фонд, организирајќи Полумаратон во беспрекорни услови, така што за сите останати организации, пред се вложувачи во атлетските настани, ова треба да биде шлаканица. Сакаш голема манифестација – плати голема манифестација. Сакаш големи имиња – плати големи имиња. За да бидеме попрецизни, односно да го поткрепиме она што го зборуваме, победничката, новата Светска Рекордерка, Jepchirchir, утрово за својот неверојатен подвиг, во заден џеб од фармерки си стави 113.000$!!! 13.000$ за победа и 100.000$ за Нов Светски Рекорд. Така се прави Атлетика.

Да прејдеме на трката. Рековме најсилната постава било кога најавена, беше дел од RAK Half. За Jepchirchir да стигне до Светскиот Рекорд и беше потребно да ја совлада легендарната мајка на две деца, ултра силната маратонка, кенијката, Mary Kеitany. Како тоа го направи Jepchirchir? Така што ја трчаше секоја наредна 5-ка во negative split, се додека не ја помине целната линија. Откако ја помина, падна на земја, колабираше и беше изнесена на носилки. Ете затоа овие дисциплини се над се останато во светот.
Првите 10км ги помина за 31:05. Вторите 10км ги помина за 30:33. Со овој резултат, на 10км на стаза се станува Светски првак. Колку за илустрација. Еве како изгледаа нејзините премини на секои 5км:
– 15:37; 15:27; 15;24 и 15:10.

Сведоштвата кажуваат дека во последниот километар, Jepchirchir нагло го успорела ритамот и почнала да се тетарави лево-десно, особено во последните 800м, кога буквално ја барала целната капија. Со други зборови, оваа трка ја истрчала ALL OUT, БЕЗ ПРЕСЕДАН! Во финишот колабирала од истрошеност.

Новара Светска рекордерка во полумаратон колабирала во финишот со 65:06

Новата Светска Рекордерка во полумаратон Jepchirchir колабирала во финишот со 65:06

За останатите тркачки, не е потребно да говориме. Најголемата на сите времиња, Tirunesh Dibaba, Олимписката Шампионка во Маратон, Jemima Sumgong и останатите во прилог:

 Топ 10 резултати – ДАМИ
Пласман Име Земја Резултат
1 Peres Jepchirchir 1:05:06
2 Mary Keitany 1:05:13
3 Joyciline Jepkosgei 1:06:08
4 Jemima Sumgong 1:06:43
5 Tirunesh Dibaba 1:06:50
6 Helah Kiprop 1:07:48
7 Rose Chelimo 1:08:37
8 Veronicah Nyaruai 1:09:33
9 Anne-Mari Hyrylainen 1:12:39
10 Etagegn Woldu 1:14:46

Машката трка секако помина во сенка со оглед на сензационалната трка кај дамите. Сепак вредно е да се напомене дека кениецот Bedan Kiroki, кој финишираше како второпласиран на минатогодишното Светско Првенство во Полумаратон, во Кардиф, утрово победи со надмоќна трка и резултат 59:10. А второпласиран, само 16 секунди позади него (59:26), финишираше кениецот со најдобро лично постигнување на 800м (1:44), Augustin Choge. Каков само дијапазон на перформанси поседуваат овие момци и девојки!

 

Permalink