Предизвик за 08-ми март: на стартот на Гази Баба да има приближно толку дами колку што има и мажи

ОК, трката е на 5-ти март, но сепак,

Предизвик за 08-ми март: на стартот на Гази Баба XC Challenge 2017 да има приближно толку дами колку што има и мажи, ако не еднакво или повеќе.

Киро: Не ме боли газот за народните права, ниту народот ги заслужува, ниту може да ги има, ниту ако ги добие ќе знае што да прави со нив. (Лет во местоГоран Стефановски)

Знаете, еднаквоста на правата на жените не ни била дадена така, зошто мажите им текнало дека сме еднакви. Не. За еднаквост се бореле генерациите пред нас и сеуште не сме еднакви во секое поле, секаде во светот. Ако сакаме да не сметаат за рамноправни, мора да докажеме дека сме и дека заслужуваме така да сме третирани. Со седење пред телевизор, со оправданија дека сега сум мајка и сум ја завршила моја работа во општеството не се борите за еднаквост за себе, за вашите мајки, сестри и над се, на вашите ќерки и тие кои ќе дојдат по нив. За еднаквост се рaботи напорно.

Не знам дали сум ви кажала, но кога се подготвував да го истрчам Македонскиот рекорд во маратон од 3:07, за време на трката во Милано, немав на памет да ја победам Милена или Марија или Росица или Рената или било која друга девојка. Не затоа што не се предизвик и јаки атлетичарки за почит. Но, јас едноставно не сакав само да бидам подобра од другите, да ги победам другите. Атакував на Олимписка норма, која за маратон изнесува 2:45, односно треба да имам барем 2:44.59 за да имам норма. Со време кое почнува со 2:44, единствено мојат брат Александар моментално би имал појак резулатат во Македонија. Што е ок со мене, за него точно знам колку тренира и колку чесно вложува.

zСакам да (до)кажам дека може да бидеш и Disney Running Princess, но и да имаш резултат вреден за почит. Можете да бидете и мајка и жена и шефица и директор и сеуште да се грижите за своето добро здравје и квалитетно поминато време вон секојдневните обврски, каде може да бидете свои и да изгледате убаво. Дали е лесно? Нормално не. Но никогаш порано во историјата не било пореално и поизводливо за една жена да биде што ќе посака и за тоа да биде испочитувана, препознаена и ставена на пиедесталот каде што и е чесно заслуженото место. Секако, сеуште имаме уште многу за да ова биде реалност за СИТЕ нас, но ни треба меѓусебна подршка и мотивација, а и активна иницијатива. Погледнете ја само Кенијката Перес Џепчирчир која неодамна истрча Светски Рекорд во полумаратон за неверојатни 1:05.06. Знаете колку машки во Македонија трчаат толку? НИТУ ЕДЕН! Знаете колку трчаат приближно до ова време? НИТУ ЕДЕН! Најблиску до ова “женско време“ има истрчано Дарио со неговиот НР од 1:11, што е за 6 минути послабо од неа. Или нејзината конкурентка на трката и сонародничка, трократна победничка од Њујорк маратон, Мери Кејтани, мајка на две деца. Мислите дека овие дами се борат за еднаквост и еднаква заработувачка како мажите со протест пред Владата и Претседателот на Кенија, со банери и пуси-кет капи? Не! Тие тренираат барабар со машките во Кенија. Знаете колку заработи Џепчирчир за новиот рекорд и победата? 113.000$!!!

Мислите дека на Скопски маратон (како и на другите маратони во светот) природно е прифатен награден фонд еднаков за мажите и жените? Не. Некој се изборил. НекојА. Имам привилегија да знам дека таа некоја кај нас е Гордана Кузмановска. Малкумина ја знаат, но таа е жената зад Скопски, која не е помалку заслужна за изгледот на маратонот од остатокот од машкиот тим, кој веројатно повеќе ви е познат од неа. Но затоа ни е потребна заедничка подршка. Ако јас и уште неколку други девојки не се одлучевме да трчаме на овој маратон, во чие име ќе зборуваше и ќе се бореше Гордана дека е потребен ист награден фонд?

 Веќе сите ја знаете и приказната за првата жена која настапила на маратон воопшто, на Бостонски маратон, Kathy Switzer. Мислите дека таа чекала да ја пуштат да трча на маратонот или протестирала со банери и пуси-кет капчиња за да се смилуваат и да ја пуштат организаторите да трча? НЕ! Застанала на стартот и стартувала заедно со другите машки околу неа. Дали и било лесно? НЕ! Но сепак не чекала, не молела, туку превземала иницијатива.

Затоа во охрабрувам сите драги дами да го прифатите овој предизвик и да се пријавите на кросот Гази Баба, да бидеме уште еден чекор понапред  во тоа да покажеме дека можеме! И за крај, и на мене како жена-организатор на оваа трка ми е потребна подршка од вас, додека се борам и докажувам дека заслужуваме еднаков третман, не зошто ни е даден, туку дека сме се избориле и заслужиле. Затоа што сме застанале рамноправно на стартната линија и сме влегле со свои сопствени сили во финишот!

За момците кои останаа до крај да го прочитаат  постот покрај феминистичката нота во текстот –  ви благодарам и ќе го сметам за подршка. И ќе ве замолам да продолжите да им давате подршка на дамите околу вас, да ги мотивирате да учествуваат на вакви манифестации, да спортуваат, рекреираат, да ги уверите и покажете дека ќе бидете тука за нив кога ќе им треба помош. Да ги причувате децата, или да направите ручек, или да измиете додека таа одвои време за себе. Подеднакво колку што таа прави за вас кога ви треба на вас време за себе. На крајот од  денот, сите имате бенифит, вие покрај вас ќе ја имате посакуваната, среќна, задоволна, згодна, одржана, вечно млада во духот дама која сте ја засакале и таа истото ќе го гледа во вас. Спортот е повеќе од само од губење време и занесување. Спортот е баланс, стабилност, исполнетост, задоволство.

Доколку се чувствувате и мислите исто, ве молам споделете со вашите пријатели/ки и поканете ги да дојдат, да се пријават, да учествуваат или да навиваат. На сите ни е потребна взаемна подршка.

На овој линк со стартна листа може да следите како се движи пријавувањето.

(*доколку не ви се појави вашето име веднаш по пријавата, во ред е, тоа е нормално, без паника, ќе се рефрешира системот и ќе ве има во најскоро време)  

Пријавувањето се одвива преку https://www.smartrace.club/

Permalink