Светско Првенство Во Крос Кантри, Кампала, Уганда, Овој Викенд

Крос кантри трките секогаш биле и ќе останат едни од најискрените и брутално сурови трки, без разлика колку и да изгледаат неатрактивни, во однос на на пример трките на стаза. Не паметам ниту една крос трка, на ниту едно првенство или било каков крос собир, а да биле тактички трки, мерени, премерувани, умерени, досадни. На кросовите едноставно се гази јако од почеток до крај и зависно од пречките кои се по текот на патеката, подобар пласман собира оној кој е вистински подготвен за совладување на сите тие пречки.

Во недела, во престолнината на Уганда, Кампала, ќе се одржи четириесет и второто издание на Светските првенства во крос кантри. Со ова првенство, стартниот пиштол ќе означи еден своевиден старт на една малку поинаква ера на светските првенства во крос. Во Кампала за прв пат покрај стандардните дисциплини, јуниори (U20) и сениори, ќе се одржи една нова дисциплина. Тоа ќе биде штафетна трка, која ќе биде долга 8км и ќе трчаат 4 члена од една репрезентација, по 2км секој. Правилото е да бидат членови двајца машки тркачи плус две дами, а редоследот на измени не е важен, секоја репрезентација сама си одлучува како ќе ги распореди тркачите.

Паметиме дека програмата на светските првенство во крос со години претрпуваше своевидни измени, па пред околу една декада, имаше таканаречена кратка дистанца (4км) и долга дистанца (8км). Па така, светската легенда, етиопјанинот Кенениса Бекеле, трчаше првиот ден кратка дистанца и победуваше, а подоцна, наредниот ден победуваше и на долгата дистанца. Едноставно беше класа и апсолутна доминација.

Оваа година најавени се големи светски имиња, а конкретно во штафетните трки се најавени двете најголеми имиња во машката и женската конкуренција, тркачи на 1500м, кенијецот Асбел Кипроп и етиопјанката Гензебе Дибаба. Тие двајца можеби и ќе се сретнат и ќе имаат директен дуел во некоја од измените, земајќи во предвид дека се очекува Етиопија и Кенија да ја играат главната роља во сите дисциплини. Тие две репрезентации освен што располагаат со цела армија на светски тркачи, се и за огромна пофалба, затоа што до сега не пропуштиле ниту едно првенство, додека некои од другите репрезентации и земји на некој начин ги потценуваат крос првенствата.

Наградниот фонд на ова СП не е воопшто наивен. Вкупниот фонд изнесува 310.000$, а земено по ставки (во американски долари – $), изгледа вака:

Индивидуална трка (се наградуваат само сениорите, дами и мажи):
1 – 30,000
2 – 15,000
3 – 10,000
4 – 7000
5 – 5000
6 – 3000

Тимски редослед:
1 – 20,000
2 – 16,000
3 – 12,000
4 – 10,000
5 – 8000
6 – 4000

Штафетна трка:
1 – 12,000
2 – 8000
3 – 6000
4 – 4000

Доколку успееме да најдеме линк на кој ќе можеме да ги следиме трките во живо, благовремено ќе го постираме на нашата ФБ страна.
Им посакуваме успех на сите учесници!

Permalink