Дарио Ивановски – Вашиот Нов Победник На Белградскиот Полумаратон!

Со мало задоцнување (заради отсуство од земјава), ви должиме еден наш мал осврт на она што се случуваше во Белград изминатиов викенд. Во престолнината на Р. Србија, по 30-ти пат, се одржа традиционалниот Белградски Маратон. Иако своевидно чудна организација, во однос на 3-декадното искуство, во однос на квалитетот на тркачи, во однос на третманот на тркачите, во однос на стазата и во однос на многу други параметри, сепак, ваков голем балкански настан, вреди да се проанализира. Јас лично не би го ставил ни од близу на рамниште на нашиот Скопски Маратон, не тоа е само мој став.

На овој настан, Македонија редовно учествува со најмалку 50-тина трчачи, секоја година. Судејќи по оно што го видов на социјалните мрежи, таму имало одлична забава, која ја приредиле самите трчачи и луѓето покрај стазата. Значи тоа е најверојатно и единствената подобра страна на овој Маратон во однос на Скопскиот. Но ајде да ги охрабриме и нашите сограѓани да го дадат својот допринос, да направиме една голема фешта низ скопските улици на 7ми Мај.

Да се навратиме на Белградски Маратон. Меѓу останатите наши домашни трчачи, трчаше и нашиот актуелен најдобар полумаратонец и актуелен Национален Првак во Полумаратон, Дарио Ивановски. За него многу пати сме давале анализа на неговиот напредок во Атлетиката, неговите изминати, како и престојни трки. Тој во саботата, на Белградскиот Маратон испиша една своевидна историја во македонската атлетика, како и трага на Белградскиот Маратон. Во полумаратонската трка победи во висок стил, со резултат 1:10:00 и оставајќи го позади себе второпласираниот 40-тина секунди, што преставува сериозна разлика. А второпласиран е српскиот репрезантивец и 2:24-маратонец, Велимир Бојовиќ.

На самото заминување за Белград, со Дарио имавме кратка дискусија околу неговите шанси на полумаратонот во Белград. Му кажав да го држи Бојовиќ во група и дека резултат од 70 минути не му бега. Така и излезе, што не ме прави пророк. Јас едноставно фанатично ја следам атлетиката (наша, балканска, европска и светска) и знам кој до каде е и со колкави моментални капацитети располага.

Овој резултат на Дарио преставува еден своевиден come back на оние вистински силни резултати во македонската атлетика. Нешто што оддамна не сме виделе како резултат, на пример резултат под 70мин на Полумаратон, резултат под 31мин на 10.000м, па дури и оние мои два резултат на Маратон – под 2:40. Актуелниот Национален Рекорд во Полумаратон е во сопственост на Трпе Мартиновски и изнесува 1:07:36. Да се потсетиме дека Дарио Ивановски изминатава зима го сруши токму неговиот 23-години стар Национален Рекорд на 3000м во сала, кој сега изнесува 8:28, па зошто да не очекуваме да го нападне и овој полумаратонски рекорд.

На Дарио му претстои силен Скопски (полу)Маратон за две недели, а таму го очекува рамна и брза патека, топло време и се надеваме и силна меѓународна конкуренција, за извлекување на што повисок резултат. Навиваме токму тој да стане првиот македонски тркач, кој ќе биде победник на Скопскиот Полумаратон, нешто што минатата година му избега за малку, кога и го истрча (до саботата) својот најдобар резултат (1:11:14).

Честитки за Дарио од тимот endurance.mk!

Permalink