“Издржи, кралице“ – прва книга со атлетска содржина во Македонија

Како што прочитавте во насловот, издадена е првата книга со општа атлетска содржина во Македонија.

Автори на книгата сме јас (Весна) и мојот брат Александар. За оние кои сеуште не знаете кои сме професионално, запознавање: шампиони, рекордери и репрезентативци на Македонија, специјализирани за долги патеки, со акцент на  маратон.

Оние кои нè следите на овој простор подолго време, можете да ја претпоставите содржината на книгата која има нешто повеќе од 300 страници. Тоа значи дека во неа ќе најдете одговори на сите прашања поврзани со овој спорт и рекреативното трчање. Текстовите опфаќаат совети од нас, од лично искуство, споделуваме наши лични стории за се низ што сме поминале во текот на 18 години атлетика во Македонија, за нашите почетоци и како и секогаш, сме многу искрени, критички и самокритички настроени, со постојана потрага за успех во овој спорт, веројатно и доста контроверзни на моменти. Никако лажни и лицемерни.

Ќе дознаете и многу детали околу подготовки за трки, маратони, Скопски маратон… Имаме и автори-гости, кои се успешни атлетски работници, како Филип Колевски (поранешен член на Младинската и Сениорската атлетска репрезентација на Мaкедонија и актуелен успешен атлетски тренер) и Томе Попчевалиев (поранешен член на Младинската и Сениорската атлетска репрезентација на Мaкедонија во дисциплините 400 м, 400 м со пречки, 800 м, 1.500 м; државен рекордер како дел од штафета 4 х 100м (клупски); коосновач на Атлетскиот клуб „Endurance“).

Што се однесува до насловот на книгата, сметам дека е најдобро да ви издвојам цитат од стр.6 за да разберете зашто се одлучивме токму за овој наслов и што значи за нас:

За техничките детали: книгата е во издаваштво на Паблишер, односно Издавачки центар ТРИ и во нивните книжарници ќе можете да најдете примерок доколку сте заинтересирани за книгата, но и на сите локации каде тие вршат дистрибуција. Исто така, книгата е достапна за он-лајн продажба на овој линк.

Сите ваши забелешки, критики и пофалби за нас се добредојдени, па штом ја прочитате книгата, ве молиме искористете ги нашите профили на социјалните мрежи за да не исконтактирате и да ни пренесете за да знаеме дали нешто сме направиле добро или не и ако/каде треба да се корегираме.

Имајте убава мисла и останете со нас на endurance.mk зашто нашата приказна е повеќе од една книга и имаме уште толку многу да ви кажеме и споделиме со вас.

 

 

Permalink