Скопски маратон 2007-2017г, плус СКМ 2017 рекапитулар

Скопски маратон 2007-2017г.

Почнав да ја пишувам оваа статија непосредно по последното издание на Скопски маратон овој мај и некако не успевав да ја завршам. Повеќе работи ни се случија во тој период, меѓу кои и издавањето на нашата книга “Издржи, кралице“, па веројатно и бев некако креативно-емотивно истрошена за да смислам нешто паметно да напишам.

И кога почнав со пишувањето, ми текна дека поминаа 10 години од ре-обновеното издание на Скопски маратон во 2007. Добро, технички ова го прави единаесетто издание, но сепак се десет години. И добро, тогаш се трчаше само полумаратон и трки на 5км и 2км за ученици. Затоа, се обидов да се сетам на некои детали од тоа издание, со оглед на тоа дека имам настапено на сите изданија од тогаш наваму, за да можам да споделам нешто и со поновата тркачка публика. Пробав и некои слики да најдам, но тоа беше пред ерата на смарт телефони, дури и пред ерата на фејсбук, за останатите социјални мрежи и да не зборувам. Пред секој да има професионална камера/фото апарат дома. А ќе речете само десет години се, па и не е така далеку!

Скопје полумаратон 2007, пред Рамстор мол, Кираџиева во средина, Чекоров на крајно десно.

Скопје полумаратон 2007, пред Рамстор мол, Кираџиева во средина, Чекоров на крајно десно.

Сѐ што најдов се неколку слики во албум на официјалниот фејсбук профил на Скопски маратон и најдов неколку слики со мене. И тогаш, разгледувајќи ги сликите, сфатив дека јас воопшто не се сеќавам на патеката. Видов неколку слики со мене од неколку локации, но немав спомени во главата дека сум трчала таму. Во мојата меморија, патеката останала како онаа која сега ја трчаме и тоа без овој дел од последните две години преку Камени мост, туку само од Рекорд. Од таа година сѐ што се сеќавам е дека стартот беше на пеколно жешко, некаде пред пладне (стартот закажан за 11ч, но стартувавме со задоцнување од 20-30мин.), пред Собрание. Се сеќавам и дека поминував под Стоковна куќа мост, кај “Мавровка“. Тоа беше на километар-два пред финиш. Се сеќавам на ова бидејќи мојот брат, Александар ме чекаше тука на точак и ми кажуваше дали има некоја конкурентка позади мене. Тој тогаш трчаше на онаа трката од 5км, тогаш сеуште не беше во маратонски “фазон“ и ми напомена да не се залетувам на надолницата под Мост, дека лаже, сите претходно се залетале, ама после следува нагорнина кон Мавровка, која после 19-20км и не е баш така “блага“ нагорнина, како што ни се чини во кола.

Пробав да најдам и некое инфо плус преку Гугл, но во тој преиод, дури и електронските медиуми немаа активен внес на информации. Но после квалитетно пребарување, најдов неколку медиуми кои дале известување за трката, највеќе посочувајќи дека Мисијата на ЕУ, на чело со Фуере се иницијатори. Веројатно затоа и се дадени информации, во спротивно никој немало ни толку да објави. И еве како одеше рутата во 2007, (иако на голем дел од патеката не се сеќавам, како да ми е избришана од меморија со магично стапче): стартот беше пред Собрание на РМ, а финишот на плоштадот „Македонија“ (кај денешна Триумфална капија), а патеката одеше  преку Црвен крст, Стара железничка, театар „Центар“ и Соборен храм преку „Партизанска“ до салата на „Партизан“ во Карпош 4. Тогаш се трчаше и по Партизанска и оттаму по „Илинденска“ преку „Мавровка“ и МАНУ назад до плоштадот. Од известувањата на новините најдов дека наградниот фонд за полумаратонот е 3.000 евра, од кои по 900 за победниците во двете конкуренции.

Победничките од Скопски полумараон 2007, на пиедестал

Победничките од Скопски полумараон 2007, на пиедестал

На фотографиите се гледам себеси на пиедестал со првите три во генерален пласман и први три Македонки (претпоставувам дека бев во први три Македонки), но кога ги отворив официјалните резултати, видов дека сум во DNF. Сеуште не ми е јасно како и зошто не се сеќавам на голем дел од трката, се распрашав и кај организаторот, мојот брат, родителите и било кој кој знам дека активно или пасивно бил дел од трката и никој немаше повеќе информации од само тој еден фото албум на ФБ. Што дополнително ми даде до знаење дека мора да продолжам вака јавно и текстуално да ги објавувам искуствата од трките, особено домашните, бидејќи многу брзо се губат од меморија.

СКМ 2017 рекапитулар

А сега, да се вратиме на 2017-та. Секоја година повторуваме како ни треба повеќе публика покрај патека, подршката е важна за сите учесници на Скопски, без разлика дали се елитните тркачи од Кенија, ние домашните фаворити или некои кои во финиш влегуваат и со 5 часа на маратон.

Старт на Скопски маратон 2017, преку Камени мост

Старт на Скопски маратон 2017, преку Камени мост

Ама да бидам искрена, јас некако си се навикнав на тоа да трчам низ релативно празни улици после 10 години низ Скопските улици на овој маратон, што мислам дека повеќе “галама“ ми пречи и ме нервира, отколку што ќе ме поттикне. Што знам… Знам само дека оваа година незабележително ми помина доживувањето за тоа дали има публика на патека или нема, некако не се ни сеќавам. Знам дека во Аеродром, пред Бисер секогаш има гужва и публика која навива или барем аплаудира и има мои комшии и пријатели кои ќе ме препознаат и некои кои специјано за тоа излегле. За сите нив ви пишуваше Димитровски тука и нема да се повторувам освен да ве пратам да го прочитате неговиот пост доколку сеуште не сте го направиле тоа, за да можам јас сега само да се согласам со изложеното од него и да ги поздравам истите ликови кој тој ги споменува таму.

Организациски, јас лично сметам дека оваа година организаторите се надминаа во поглед на претходните години и во споредба со огромен број трки во регионов и Европа.

Оваа година за прв пат имаше и изотонични пијалоци Vitargo на 2-3 освежителни станици и на самиот финиш, а благодарение на одличната соработка на организаторите на Скопски со Polleo Sport. Сите маратонци во стартниот пакет добија и енергетски гелчиња и дополнително пакување Vitargo електролити. И во финишот добивме освежителен пакет со протеински барчиња, банани и уште некои ситнурии за после трка. Мене лично овие освежувања во стартниот пакет ми беа и повеќе од добредојдени и искрено не се сеќавам на која интернационална трка надвор од Македонија, за која сум плаќала котизација помеѓу 70-90 евра, сум добила повеќе!

Занимливости: дали знаевте дека јас го правев дизајнот на медалата на овогодишниот СКМ? (изработка во “Пехар“)

Занимливости: дали знаевте дека јас го правев дизајнот на медалата на овогодишниот СКМ? (изработка во “Пехар“)

За смешната котизација од 10-15евра тука не ни зборувам.

И преку 8000 учесници!!! Кој би рекол пред 10 години, кога вкупно бевме некои 300-400 учесници дека ова би го доживеале. Многумина од вас кои го читате ова и не сте биле тука (тука, мислам во светов на трчањето) пред 10-15 години можеби и не ви изгледа ништо од ова фасцинантно, но верувајте, ѐ!

Имавме и елитни гостинки од Естонија – трите близначки и единствени Олимпијки кои претставувале една земја на Олимпијада, било кога во историјата на олимпизмот. Сестрите Луик од Естонија трчаа и победија во полумаратонската трка. Јас им бев горд домаќин, благодарение на довербата на организациониот тим на СКМ која ми ја довери оваа задача.

Кираџиева во втор половина на маратонот и дожд на патеката кај ТЦ Бисер. фото: Дарко Цветкоски

Кираџиева во втор половина на маратонот и дожд на патеката кај ТЦ Бисер. фото: Дарко Цветaноски

Временските услови беа далеку подобри од она кое го очекувавме. За оние кои прв пат настапивте, веројатно претопло, но верувајте ми кога ќе ви кажам дека ги имавме најдобрите услови на СКМ во изминатите десет години. Во втората половина на маратонот дури имавме и среќа да се наоблачи и да не освежи благ пролетен дожд.

За крај ми останува да го архивирам овој текст заедно со вас денес и да го отвориме после десет години, кога се надевам ќе пишувам нова статија во која ќе пишувам како кога сум ја пишувала оваа статија, не сум ни претпоставувал дека Скопски маратон ќе прерасне во трка од 15.000 учесници и како за следното издание, маратонот ќе биде посебен викенд-настан, одвоен од полумаратонскиот викенд со рекреативните трки. Или можеби штотуку го направив тоа? 😉

Permalink