Охрид Трчат 2017 (review)

На 4-ти јули годинава, за прв пат се одржа една улична трката во Охрид, во должина од 10км, наречена “Охрид Трчат“.

Кога јас прв пат слушнав за тркава, прво си помислив: ’кои се па сега овие што организираат трка?’. Немав чуено за организаторите, а во Македонија, мала е тркачката заедница и безмалку се знаеме кои сме оние кои се нафаќаат да организираат вакви настани. И нормално дека бев скептична. Најавата за трката излезе некаде на месец дена, или помалку од месец дена пред закажаната трка, како гром од ведро небо. Имаше објавено и фонд на награди кој за македонски услови беше и повеќе од фер, па нормално да се запрашате кој е толку ’дрзок’ да се нафаќа на вака голем потфат.

Освен тоа, трката беше најавена дека ќе се трча низ центарот на Охрид,  по главните булевари кои ќе бидат затворени за настанот.

Во меѓувреме, организаторите имаа направено интересна мини кампања каде во забавен стил, не само што ги повикуваат охриѓани и сите останати да се пријават и да трчаат, туку и ги повикуваат да дојдат, да навиваат и да ги подржат тркачите, но и да внимаваат да не ги паркираат возилата на улиците и тротоарите каде проаѓа рутата на трката.

 Тука организаторот ги придоби симпатиите на тркачката заедница. Јас, како и останатите, видовме организатор на страна на тркачите, бидејќи обично сме ние, тркачите, против светот (оние кои нѐ свиркаат на булевари, ретката публика која повеќе не пцуе отколку што навива, натегнување со организаторите за потребите на тркачите и сл.), со ретки-ретки исклучоци кои не верувам дека има потреба да ги издвојувам во оваа прилика.

Но тука сме да зборуваме за оваа трка и вреди да напоменам дека “Охрид трчат“ беше една од овие ретки-ретки исклучоци на безмалку совршена организација, особено земајќи го во предвид фактот што ова беше прво издание.

Кога се појавив пред стартот, веќе сѐ беше подготвено. Контролни точки и чип систем подготвен, стартно целната капија на место, музика и стејџ наместени, а водителките од радио Антена 5 го водеа настанот. Тимско загревање со фитнес инструктори за сите учесници кои сакаат да се загреваат со музика, исто така беше обезбедено од организаторите. Голем број на пријателски и насмеани лица пред стартот. Сега се сетив дека единствено што ни фалеше пред стартот беа  мобилни тоалети и простор за пресоблекување и безбедно одлагање на личните работи додека трчаме. Но се снајдовме, како за прва година организација. И втора работа, од некоја причина, стартот доцнеше, па ова малку придонесе за нетрпеливост помеѓу учесниците на стартот. Но сѐ се заборави штом пукна стартниот пиштол.

Страт на трката Охрид ТрчаТ 2017

Страт на трката Охрид ТрчаТ 2017

Откако стартувавме, патеката беше фино обезбедена и обележана. Дури имавме и солиден број на публика кои не стоеја само да фаќаат сеир, туку и викаа и навиваа. Имаше и освежување на неколку места по патеката и волонтери кои не насочуваа и не подржуваа нас тркачите. Очигледно рекламната кампања на организаторите допрела до граѓаните.

И патеката беше интересна, необична и разнолика, бидејќи се трчаше низ позначајните локации на градот Охрид, во кои верувам дека повеќе уживаа рекреативните тркачи, отколку ние кои бркавме пласман и не гледавме ништо друго околу нас.

Во финишот, исто така имаше освежување за секој финишер, овошје и вода, доволно за да дојдете до здив. Победниците, освен предвидениот фонд на награди, добија и фини сувенири од локална охридска уметничка со филиграни, кои секако додаваат уникатност на овој настан во секој поглед.

Победнички на Охрид трчаТ 2017 со организаторите

Победнички на Охрид трчаТ 2017 со организаторите

Секако дека секогаш ќе има по некоја забелешка во поглед на организацијата и по некои мали пропусти и недостатоци, дури и да трчате на Њујорк маратон, ќе најдете луѓе кои ќе ви се пожалат дека им пречеле каменчиња или дека улиците не биле измиени и имало прашина. Не може секогаш на сите да им се удоволи. Но важен е генералниот впечаток. А јас не слушнав некоја критика за овој настан, особено што е ова прво издание на трката. И јас и мојот тим како учесници сме задоволни од целокупното издание на трката и искрено се надеваме и им посакуваме долгогодишна традиција во уште подобро свело, со моќна европска и светска елита и огромна масовност низ улиците на Охрид.

Зошто сега пишуваме за оваа трка, дури шест месеци подоцна? Прво, затоа што заслужува промоција. Второ, пред извесен период, организаторот ме контактираше мене и уште неколку еминентни атлетски имиња од домашната сцена кои земавме учество на трката, а со цел да му дадеме забелешки за трката, а со цел тие да ги корегираат за во иднина. Искрено, кога ме прашаа, не ми текнуваше ниту една забелешка (освен оние две точки кои горе ги споменав, а на кои се сетив сега, додека пишував), па затоа решив, доколку немам критика, зошто да не напишам пофални зборови.

За следната година, организаторите најавуваат многу интересни новини за сите учесници, кои ќе ги објават на својот нов веб сајт кој ќе го лансираат наскоро, а и пријавувањата ќе бидат наскоро отворени.

Погледнете видео со кратко сиже од трката и видете како поминавме годинава, па се надеваме дека ќе ве мотивира за наредната година да си фатите место на време и вие:

 

Permalink