Крај На Една Убава Спортска Крос Кантри Традиција – Gazi Baba XC Challenge

Велат, тоа што нема да не скрши, не прави посилни. Да, ама не е баш така. Тоа што упорно не крши, подобро е да дигнеме раце, глава од зид да тргнеме и нека тераат работите како што им е природен текот. Gazi Baba XC Challenge ја почнавме во 2011та. За помалку од 2 недели требаше да биде 8-ма традиционална манифестација. Но само требаше. Како и што кажав, не вреди со глава во зид и по секоја цена.gazibaba3

Gazi Baba XC Challenge емотивно ме врзува. Емотивно ги врзува и многу други. Тоа е веќе 7 години во низа, прв атлетски настан, кој ја отвора годината, репер за голем настан, крос кантри собир каков што Македонија никогаш немала, собир на позитивни луѓе, настан со без малку светски дострели и критериуми. Но настан кој многу луѓе допуштија да дојде до маргините. Велат парите не се се’ во животот. И во право се. Тој што го вели тоа, нека организира манифестација од европски, светски калибар, со 0 средства.

Емотивно го врзуваше и Коце Трајановски. Три години Градот Скопје, преку амин од Коце, префрлаше некои симболични 500-600 евра. Ееееј гледавте шоу, а некои луѓе мислеа дека се вртат илјадници евра. Дека тука спонзори се тепаат, кој повеќе да наддаде. Толкава манифестација, толкав пред се емотивен влог, за такви минимални средства. Минатата година, заради добро познатата политичка ситуација во земјата, Градот Скопје се одлучи да не ја финансира трката. На ш’крги ја истеравме уште еднаш, за да не ја предадеме така лесно. И не знам дали дали чувствувам гнев према тогашните политички структури или кон кого. До вчерашниот градоначалник на Општина Гази Баба, Тони, години и години наназад само ветуваше подршка од Општината. И НИКОГАШ не ја даде. Не даде ни 100 денара за кредата да ја купиме, да го обележиме стартот. А толку се удираше во гради. Доаѓаше неколку години, се сликаше, означуваше старт, се смееше со нас, па и ние кисело се смеевме, како толку да сме среќни што дошол и не удостоил со своето присуство. Велат: се се врти, се се менува. Сега тој ист човек ќе се смее, ама на некое друго место.
Преку многу страни сме се обиделе од приватниот сектор да добиеме некаква подршка. Но се што сме добиле биле водички и чоколатциња. Им благодариме и за тоа.

На таа иста пољана, се запознаа голем дел од екипата на Скопско ноќно трчање. Се запознаа голем дел од екипата на NRC. Се запознаа голем дел на 091 Run Crw. На таа иста пољана, ги донесовме да трчаат европските медалисти, Митко Ценов и Милица Мирчева, заедно со 2:19 маратонецот, Иоло Николов. Со тие исти средства, европски крем учествуваше на нашата скромна трка. Големи емоции вложивме во организација на GB XC Challenge. На таа пољана нашиот Дарио Ивановски ги имаше почетоците во Атлетиката. И еден куп други големи и помали трчачи, се запознаа со духот на трчањето токму таму.gazibaba1

На таа пољана за 2 недели ќе биде се исто, освен што нема да се слушне истрелот на стартот. Премногу опструкции од сите страни, премалку љубов. Опструкции од финансиски аспект, опструкции од голем дел од трчачката заедница, многу мала подршка од било која страна и премалку искреност и желба за да се помогне да постои нешто убаво.

Искрено им благодарам на сите кои низ изминатите години биле со нас, заедно сме ја граделе оваа голема манифестација, учествувале на било каков начин во убавината на оваа манифестација. Но овој пат ставаме точка, конец. Немаме повеќе ниту ентузијазам, убиена е секоја воља, борба за финансии, борба за масовност, борба да им се донесе нешто убаво на луѓето, за минимални пари, борба за нашата младина да се отсликува од нешто убаво и здраво. Очигледно тоа не им се допаѓаше на многумина, па затоа и дозволија да потоне.

Се гледаме се надевам во некоја наредна прилика.

Спортски поздрав,
Александар Кираџиев.

GBXCChallenge15-640x323

Permalink