2:15.25 на Пола Редклиф ќе биде нападнат на Лондонски маратон?!

Рекордот во маратон за жени стои од 2003 година, кога нашата идна гостинка на Скопски маратон, Пола Редклиф истрча со време од 2:15.25, токму на овој маратон – Лондонски мартон.

Оваа година се најавува можност да биде нападнат, а можеби и соборен петнаесет години стариот рекорд на легендарната Редклиф. Но пред да ги рагледаме реалните шанси и очекувања, да разјасниме некои работи во однос на женските рекорди во маратон, за кои одамна ви ветувам дека ќе ви разјаснам.

Зошто постојат два рекорда за жени и кој се важи? Едниот таканаречен “Мешан Пол“ (“Mixed Gender”) кој го држи Paula Radcliffe од 13ти Април 2003 поставен London Marathon, и изнесува 2:15:25, а другиот, таканаречен “Само Жени“ (“Women Only”) кој го држи Mary Keitany, поставен исто така на London Marathon, но лани, на 23ти април 2017 и изнесува 2:17:01.

Кенијката Mary Keitany и Етиопјанката Tirunesh Dibaba, пред Лондонски Мост

Кенијката Mary Keitany и Етиопјанката Tirunesh Dibaba, пред Лондонски Мост

Овој првиот, на Редклиф е поставен на трка каде таа трчаше заедно со машки и затоа е наречен “Мешан Пол“. Односно, се смета дека таа го има истрчано овој рекорд со машки пејсмејкери кои и помогнале да истрча појако отколку што би се очекувало да истрча доколку немала пејсмејкери. Откако се дебатираше и полемизираше за ова, ИААФ (Интернационалната Атлетска Асоцијација на Федерации) одлучија дека женските кои ќе бркаат светски рекорди, како и на сите поголеми интернационални манифестации, како Светски, Европски првенства и Олимпијади, ќе имаат посебен старт од машките, односно без можност за машки пејсмејкери. И во оваа втора опција на таканаречени “Само Жени“, рекордот од лани стои на 2:17.01 (претходно исто така и овој рекорд беше на Редклиф).

На прашањето: епа добро тогаш кој рекорд се важи? Технички и по правила на ИААФ и двата се важат, секој во своја категорија, со машки или без машки пејсмејкери. Лично мене ако ме прашате, овој вториот само ги коплицира работите, јас го важам оној рекорд на Пола Редклиф од 2:15! Со или без пејсмејкери, таа со свои напори, со свои нозе и пот го истрча овој неверојатен резултат кој и ден денес само одреден број на мажи можат да се пофалат да го истрчаат. Никој не ја носеше на носилки до финиш, ниту ја возеше на мотор. Го истрча на своите две нозе. Ниеден Македонец не е ни блиску до овој резултат. Така што ДА, 2:15.25 на Пола Радклиф за мене е и ќе биде единствен и официјален рекорд, сè додека некоја друга не го собори.

И ете сме тука до прашањето кое ќе чекаме да ни биде одговорено во недела, на Лондонски маратон, дали ќе биде соборен овој рекорд на Редклиф кој датира од 2003 година?

Премногу голем фан сум на Редклиф за да објективно ви одговорам, па субјективно, не сакам тоа да се случи. Плус фактот што ја очекуваме за две недели во Скопје!

Но да заборавиме на субјективното, па да ги разгледаме фактите и како стојат работите реално.

Мери Кеитани (36год.) и Тирунеш Дибаба (32год.) се претендентите кои оваа година најавуваат напад на рекордот на Редклиф (на овој од 2:15). Тоа значи дека организаторите на Лондонски маратон оваа година обезбедија машки пејсери кои ќе се обидат да ги повлечат девојките во обидот. Мери Кејтани беше минатогодишна победничка на овој мартон и токму тогаш го собори овој вториот рекорд 2:17 на Редклиф и очигедно оттогаш ја мачи идејата да го собори и овој од 2:15. И навистина има реални шанси. Оваа година истрча полумартон од 1:04.55. Со овој резултат на полумаратон, реално е да се очекува резултата околу 2:15. Според Тркачката Формула на Проф.Др Џек Дениелс, резултат на полу маратон од 64:35, се претвора во резултат од 2:15:25 на маратон, што технички и фали на Кеитани, бидејќи нејзиниот резултат на полу е 64.55. Секако тука зборуваме доколку се поклопат сите останати факти, особено временските услови на денот на трка. И доколку сè останато се поклопи, таа сеуште има да спушти минута ипол (поточно 1:35) од нејзиниот личен за да стигне до рекорд.

Другата претендентка за рекорд, Дибаба има да спушти 2ипол минути од нејзинотот најдобро постигнување во маратон 2:17:56, за да стигне до 2:15,25 на Редклиф. Таа е сеуште една од најтрофејните атлетичарки во историјата на атлетиката, со три Олимписки медали, пет светски титули и моќни резултати од 14:11 на 5.000, до 29:42 на 10.000м., но сепак, реултатот на Пола е премногу далеку од оваа гледна точка.

елитните девојки за Лондон маратон 2018

елитните девојки за Лондон маратон 2018

Што се однесува до останатите девојки на елитната линија, Vivian Cheruiyot победничка од Франкфурт маратон, Rose Chelimo – светска шампионка, Gladys Cherono победничка на Берлински маратон и  Tigist Tufa победничка од Лондонски маратон 2015г. се имињата за на стартот. Но на прашањето на репортетот од Lets Run, дали некоја од нив ќе се обиде да фати приклучок кон Кеитани и Дибаба барем до пола пат во обид за рекорд, тој вели дека сите го гледале бледо без одговор, како да ги прашал: “Што мислите, какви ви се шансите да го победите  Eliud Kipchoge во недела на маратонот?

Да заклучиме: Мери Кеитани и Тирунеш Дибаба се главни претендентки за напад на петнаесет години стариот рекорд на Пола Редклиф од 2:15.25. Единствена реална шанса според статистика на бројките (а бројките не лажат) има Кеитани, секако доколку ги знаеме сите бројки, но не ги знеме оние од нејзините тренинзи. Мое лично предвидување од овие бројки е дека Кеитани има шанси во добри услови да оди време во рамки околу 2:16.20 па до 2:15:50, но шансите да оди и под 2:15.25 се мали. Доколку сепак успее, тогаш ова време е лудост, а зошто, не ме прашувајте мене, прашајте ги машките кои се борат да истрчаат под 2:15 маратон!

 

Permalink