Зошто сениорскиот тим на Македонска репрезентација финишираше заедно?!

Вчера (01 јули) во Скопје, на Водно се одржа Европското првенство во планинско трчање. Таму настапи и Македонската репрезентација.

Но, машкиот сениорски тим, трката ја истрча заедно и не го дадоа својот максимум на делницата од 11км., а мал дел од патеката го трчаа 5 атлетичари, наместо предвидените четворица, колку што е и лимитот на дозволени натпреварувачи од еден тим.

Бидејќи и јас како дел од репрезентативниот тим бев таму, точно знаев што се случува, но за жал многумина не ја сфатија пораката, а не се ни обидоа. Во финишот,  Претседателот, Селекторот и останатите високи структури на АФМ, до кои и беше наменета пораката на овој протестен потег на атлетичарите, не допре до нив, а наместо тоа, коментарот на Претседателот бил: “Подобро воопшто да не стартуваат, отколку вака да не брукаат!“

Претседателе и претседателство,

намерата првично ни беше НИКОЈ да не трча, цела репрезентација да ве бојкотира поради вашиот игнорантски однос кон своите домашни атлетичари. Дали тогаш немаше да ве брукаме пред цела Европа?! Можеби сепак требаше никој да не стартува, за “да не ве брукаме“ Додека потрошивте пола година успешно да ги угостите Европските гости и атлетичари, ниту еднаш не се заинтересиравте за нас! Ниту се запрашавте зошто овие атлетичари влегоа во финишот заедно и не го истрчаа својот максимум!

Да не се објаснувам, еве ја изјавата на Атанас Анчевски, Александар Кирковски, Марјан Бонев, Милош Ранчиќ и Муџахид Муслимовски, репрезентативците на Македонска атлетска репрезентација:

“Денес членовите на македонската сениорска репрезентација во машка конкуренција се соочивме со најтешката одлука за еден спортист, да истрчаме трка во знак на револт.
Наместо да бидеме најмотивирани и концентрирани единствено на трката и давањето на својот максимум за достојно претставување на нашата татковина на домашен терен, ние бевме психолошки исцрпени и демотивирани поради НЕОРГАНИЗИРАНОТО, АМАТЕРСКО и ПОНИЖУВАЧКО однесување демонстрирано од Атлетската федерација на Македонија.
Ваквото незрело однесување го потврдуваше преку целиот процес на организација и селекција на репрезентацијата почнувајќи со организирање на изборна трка во последен момент (2 седмици пред Европското првенство), недефиниран состав на машката сениорска репрезентација, предлози од страна на раководството на АФМ на ден-два пред европското првенство составот да се бира со трка на 3000 метри, ждрепка и други смешни предлози.
Одговорните за избор на репрезентацијата немаа доблест да се сретнат со нас во насока на решавање на овој нивен пропуст, туку одговорноста ја префрлаа на тренери и лица кои не се задолжени за носење на такви одлуки. За целиот овој период селекторот кој е одговорен за тимот беше недостапен за репрезентацијата.
Ваквото НЕПРОФЕСИОНАЛНО работење на Федерацијата веќе години наназад претставува секојдневие, НО за ваков настан и ваква доделена чест за организација на Европско првенство е НЕДОПУСТЛИВО да се остави вакви прашања да лебдат во воздух до последен момент.
Со ова ги премина сите граници на толерантност!
Сите ние ова го правиме од чиста љубов кон спортот, вложуваме време и лични ресурси и на никој начин не сме компензирани за тоа.
Ние не живееме ОД спортот туку ЗА спортот!
Ние не постоиме за Атлетската федерација туку таа постои за нас, за атлетичарите!
Благодарност до сите волонтери и навивачи кои неуморно не’ бодреа покрај патеката!
Ние денес имавме тешка задача да ја трчаме оваа трка на овој голем настан на домашен терен со надеж за подобра иднина во атлетиката, со надеж за соодветен третман на државните репрезентативци, прваци и рекордери!
Со овој потег се надеваме дека придонесуваме за позитивни промени во атлетиката во Македонија!!!“

Permalink