Дизајнот на медалата и маицата на Скопски маратон 2018

Ќе почнам од крајот и веднаш ќе пишам дека за дизајнот на финишер медалата и маичките (за трката на 5км) беше задолжена Ана од Сувенири од Скопје. Иако ова и не é тајна, а организаторите веднаш ја споделија оваа информација, сепак за мене е интересна приказната во позадина и за нашата сорабока, а бидејќи се уште тркачите прашуваат за тоа, сакам и со вас да ја споделам оваа сторија.

Како и сите организации во своите почетоци, така и организаторите на Скопски маратон имаа скромни почетоци, во рамки на финансиските и општествени можности. Но, благодарение на нивната одлична работа и брз напредок станаа водечки маратон на Балканот (можеби единствено зад Љубљански), а со најкратка традиција меѓу балканските маратони (зборувам за оние големите, во поголемите и главните градови). И така како што расте маратонот, така растат и очекувањата од учесниците, публиката, подржувачите и спонзорите, но растат и нивните лични очекувања, да се надминат себеси и да бидат поуспешни од секоја претходна година и секое претходно издание на маратонот.

Маичката за 5км

Маичката за 5км

И тука некаде влегувам јас во план. Тие што ме знаете лично или нé следите редовно на endurance.mk, веројатно веќе знаете дека имаме супер соработка со Скопски маратон. Мојот придонес секогаш бил во однос на креативниот дел, а лани (2017г.) бев ангажирана и за изработка на дизајнот на медалата, а подоцна истиот дизајн се одлучија да го искористат и за маичката (само за трката на 5км, затоа што главниот покровител Wizz air налага правила според кои сакаат да се задржи автентичноста на дизајнот и логот за маичките на главната трка: маратон и полумаратон). Задоволни од нашата соработка, организаторите и оваа година ми дадоа целосна доверба и слобода во одлуките во креативниот дел, па најголем дел од содржината која можевте да ја најдете во Магазинот на Скопски маратон, интервјуата со Редклиф, со македонските тркачки и уште неколку рекреативни тркачи кои имаа интересни тркачки приказни беа моја задача, меѓу другот.

Бидејќи секој уметник си има свој стил на работа, не сакавме да се повторува стилот на медалата, па мој предлог беше да се обидеме да ја ангажраме девојката од Сувенири од Скопје. Имено, до тој момент, јас не знаев која е Ана. За Сувенири од Скопје дознав кога нé имаа тагирано на нивен пост со нивните прекрасни сувенири и нашата книга “Издржи, кралице“. Нормално дека веднаш ме заинтересира да видам кои се тие и бев фасцинирана од сувенирите и дизајнот, особено на една маичка со Триумфална капија и финишери под неа. Веднаш ме потсети на Скопски маратон.

Тркач под Триумфална капија (Сувенири од Скопје)

Тркач под Триумфална капија (Сувенири од Скопје)

И така овие слики му ги покажав и на Директорот Кире Синадиновски на еден состанок, па и на него му се допаднаа. Подоцна стапив во контакт со Сувенири од Скопје и договоривме состанок на кој конечно ја запознавме девојката која стои зад овој бренд – Ана. Прво што ја прашав – од каде ова со нашата книга и со дизајнот на таа маичка со тркачи под Триумфална капија. Излезе (нормално!) дека и таа е тркач-рекреативец и дека била мотивирана од нашата книга. За мене немаше потреба од дополнителни убедувања – готово, ангажирана си 🙂 Секако организаторот го има поседниот збор и на нив им се допаднаа предлозите и така од јануари оваа (2018) година, активно работевме на дизајнот.

Е тоа беше постапка, бидејќи Ана ни дојде со некои десетина идеи и требаше да го стесниме изборот на една. Сто пат ја вративме, “овие се супер, ама на овие три треба да ги корегираш боите, на овие две многу им се големи буквите, а на овие треба да им додадеш и лого и дата…“ И така цепидлачевме до април некаде. Кој знае, ако имавме време, може уште ќе се тегневме. Тоа е кога имаш три водолии, две родени на иста дата, во различен јануари (Јас и Гоца) и Кире, перфекционист и професионалец на ниво, сори Ана.

Со Ана од Сувенири од Скопје на експото на СКМ '18

Со Ана од Сувенири од Скопје на експото на СКМ ’18

На крајот, мислам дека направивме одличен избор, а според реакциите на тркачите може да кажам дека имавме најдобра медала и маичка до сега.

Како што се сеќавате, Светската рекордерка Пола Редклиф беше гостин на Скопски маратон и сакав и таа да добие една од маичките на Сувенири од Скопје, онаа со Триумфална капија и тркачката во финиш бидејќи кога на денот пред трката ја шетавме низ позначајните знаменитости на Скопје, поминавме и низ Триуфална капија каде ѝ кажав дека е финишот. Но за жал Ана ми кажа дека сите се распродадени. Мислам, тоа е одлично за Ана што се распродале сите, па мојата маичка која таа ми ја подари како сувенир решив да ја подарам на Пола. Всушност маичката ја имав само еднаш облечено на 5 минути за сликање, ама шшш, не ѝ кажувајте на Пола, таа не знае.

Сега сме во подготовка за есенската сезона кога во Скопје не очекува уште една супер масовна трка: Скопје Трча 10К/Skopje Rin 10K.  Се подготвува нешто подеднакво одлично, а дизајнот за медалата и маичката се крчка на тивко и многу наскоро ќе ви ги откриеме. Вие само бидете трпеливи, тренирајте и подготвувајте се за трката со навремено пријавување. Средства од маичките ќе бидат донирани за СОС Детското село, ама оставам на организаторите да ви ги споделат сите супер новитети околу трката.

Имајте пријатни летни тренинзи, пијте многу течности, јадете свежа храна и се гледаме на старт!

Permalink