Гармин Македонија и веќе сте пред времето

Ок, значи ми требаше повеќе од два-три тренинга за да го истестирам новиот Гармин.

            За оние кои не ме следите на инстаграм, да ве запознаам со ситуцијата која доведе до тоа сега да го имам овој модел на Гармин – Forerunner 35. Имено, веќе подолг период мојот стар модел на Гармин – Forerunner 205 е дотраен, да не речам дишеше на шкрги. Седум години ми беше спаринг партнер и сведок на сите срушени Македонски рекорди, сите шампионски титули, сите претрчани километри кои не се добројуваат. Го добив како награда пред некои 7 години кога победив на Скопски маратон. Во меѓувреме излегоа многу пософистицирани, попрактични модели на #Garmin, ама за жал, без спонзор и како неплатена рекордерка, шампионка и репрезентативка на МКД, никогаш не бев во можност да си дозволам ни пола од тие нови ‘гармини’. Некои од моите колеги знаат да се пошегуваат “уште ли трчаш со тој лаптоп на рака”, за што не им ни забележувам, навистина е гломазен, ама сеуште вршеше работа. До последниот тренинг, кога после две сменети каишки, лепења и крпења конечно, кутриот се ослободи од мене и на сред темпо, буквално ми излета од рака. Оваа ситуација ја споделив и на мојот профил на инстаграм со надеж дека можеби некоја поголема компанија ќе може да си дозволи да ми обезбеди еден спортски часовник, во замена за моја реклама и промоција на нивниот бренд/фирма. Поголема компанија не се јави (очекувано), но набрзо во коментар добив позитивен одговор од овластениот дистрибутер за Гармин во Македонија – Gamin Macedonia. Во самиот коментар ми пишаа дека за петнаесет дена ќе ми достават еден Гармин Форранер 35. Ветено – сторено. Петнаесет дена подоцна, поштарот заѕвоне двапати и на врата имав мала кутија потпишана со мое име и презиме. И како мало дете кое го изненадил Дедо Мраз среде август, го отпакував часовникот, прочитав кратко упатсво кое не се разликуваше многу од она на мојот претходен Гармин, што значително ми ја олесни работата, бидејќи не сум баш hi-tech тип и нови технологии ме нервираат додека ги научам.

Garmin Forerunner 205

Garmin Forerunner 205

            И нормално, после ова едвај чекав да одам на тренинг и да го испробам. И нормално, како и со секое ново парче опрема, без разлика дали се патики, дрес, шушкавец или часовник, на првиот тренинг во нешто ново си мислите дека летате. Верувам и вас ви се случило тоа, да мислите дека патиките сами трчаат. Дури и да не сте тркач/атлетичар и случајно да ја читате оваа статија, сигурно ви се случило кога ќе си купите нова маичка, наеднаш да мислите дека сте поубав/а и сите гледаат во вас. Епа така нешто беше и со мене на мојот прв тренинг со новиот Гармин. Да се разбереме, патиките сами не трчаат. Ниту новиот шорц или дрес, ниту новиот часовник. Но дефинитивно значително ти го олеснуваат тренажниот процес и ти овозможуваат да се фокусираш на прогресот.

            Една од најдобрите работи кај новиов модел е тоа што на самиот часовник е вграден пулсометарот, па нема потреба дополнително да носиш трансмитер околу градите, како што тоа беше случај со постарите модели. На задниот дел од часовниот, светкаат две зелени светла кои го означуваат делот кој го чита пулсот директно од раката и го покажува на мониторот на часовникот. Искрено, не знам зошто тоа не беше случај уште од првите модели, многу поедноставно според мене не само за нас корисниците, туку и за производителите. Кој знае! Сеедно, јас не користев пулсометар претходно затоа што ми пречеше бидејќи ластикот од спортскиот градниот доаѓа точно на местото каде вообичаено стоеше ластикот кој го подржува пулсометарот. Секако немав навика да следам пулс и освен за неколку истражувања на лактатен праг за кои ви имам претходно зборувано, не сум користела. Значи оваа опција на 35-ката е одлична новина за мене.

            Друга работа која е одлична за мене е тоа што опцијата за алармирање доаѓа со вибрации. Да појаснам: за тренинзи како темпо или интервали користам опција која ја имаше и на претходнот модел на Гармин кој го користев, а тоа е опција за алармирање на одредена должина или ритам. Јас најчесто ја користев опцијата за должина, па така гарминот на секој километар ми аламира звучно дека сум одминала уште еден километар и тогаш можам да го видам ритамот и останатите параметри кои сум ги наместила да ги следам на мониторот. Но, голем дел од појаките тренинзи како интервали, темпо и должини ги трчам сама и со слушалки за музика, па со претходниот модел ми се случуваше да пропуштам некој километар/аларм бидејќи нема да го слушнам. Така, со новиот модел тоа не ми се случува бидејќи, покрај звучна сигнализација, има вибрации и светлечка сигнализација која се пали на секој километар (бидејќи јас ја имам избрано таа опција за алармирање), а светлечата сигнализација е одлична со оглед на тоа што особено летно време, трчам подоцна, кога ќе залади и ќе смена сонце, па сето ова е супер олеснителна околност да можам на раат да го следам ритамот и да се фокусирам само на тоа, наместо да му ја мислам кога да стопирам, каде е следен километар, да стиснам на сијаличката од страна за да проверам ритам и сл.

Garmin Мacedoniа и “Издржи, кралице“

Garmin Мacedoniа и “Издржи, кралице“

            Друга работа за која бев загрижена кога гледав оценки и ривјус пред да го добијам часовникот е тоа дека повеќето атлетичари (и по некој од рекреативните тркачи) имаа забелешка за тоа дека нема класична стоперица. Мислам, кој спортски часовник нема стоперица? Па тоа основната причина поради која се измислени спортските часовници, многу пред да бидат фенси гаџети со сателити и блутут конекција и телефонски опции. Од тие причини и почекав да направам неколку различни типови тренинзи за да видам што е проблемот. За мене проблем немаше. Точно дека нема класична стоперица, ама времето го мери паралелно со изминати километри, се вклучува и ислучува кога вие ќе стиснете страт или стоп на копчето и истрчаниот резултат со километри, просечна брзина, пулс, потрошени калории и уште 5-6 параметри кои јас искрено не ги ни следам завршуваат зачувани во меморија, исто така по ваша желба. Сеуште се трудам да сфатам каде е проблемот со тоа дека нема класична стоперица, бидејќи за мојот тип на тренинзи, начинот на кој функционира стоперицата е апсолутно функционална и едноставна за употреба. Плус, ако мерам темпо, на пример од 6, 8 или 10км, секој километар автоматски се зачувува во меморија и на крајот од тренингот (или подоцна, дома) може да си го прелисташ и да ги прочиташ километрите без да треба да ги паметиш (оваа опција не е нова, ја имаше и во пострите модели).

            Со претходниот модел имав проблем бидејќи ремчето беше од погруба, нефлексибилна пластика, па со текот на времето, од пот, сонце, или едноставно од употреба, ремчето пукаше. Два пати го менував и искрено тешко е да се најде соодветна замена бидејќи користат специфични ремчиња кои не може да ги најдеш од било кој друг часовник и само да ги замениш. За среќа еден комплет ми позајми тркачки пријател кој повеќе не го користеше неговиот Гармин 205. Но подоцна, како што пишав и погоре и тоа ремче пукна. Ова беше случај со сите спортски часовници кои излегоа во тој период, бидејќи читајќи ги ривјуата на интернет, сите се жалеа на оваа аномалија, не само кај Гармин, туку и кај остантите производители на ваков тип часовници, а единствено образложение кое подобрите познавачи на овој бизнис го имаа, е тоа дека намерно се така правени, со цел да ги натераат потрошувачите почесто да купуваат нов часовник. За среќа, на мојот нов Гармин ремчето изгледа доста еластично, лесно се витка и се истегнува, што за сега делува како прилично издржливо, а и не сум прочитала до сега негативно ривју за овој детал.

            Стариот модел, со оглед на тоа што имаше големина на лаптоп (не буквално, но ми ја сфаќате поентата на преувеличувањето) имаше капацитет на мониторот по сопствен избор да го поделиш на два, три или четири дела, односно истовремено да може да читаш повеќе параметри кои сам/а ќе си ги определиш, на пример, на монитор 1, јас имав време (стоперица), просечен ритам, дистанца (км.) и моментален ритам на км. На вториот монитор имав денивелација, време во денот, потрошени калории и пауза. На новиот Гармин, мониторот е помал, како и целиот часовник, што го прави попрактичен за носење, со тоа што на таа сметка на една страна на мониторот може да следиш три опции, што не е хендикеп.

Една опција која не сум тестирала, а ја има како можноста е опцијата да го конектирате часовникот со вашиот смарт телефон преку блутут конекција и известувањата, пораките и нотификации од социјалните мрежи да ги добивате и на вашиот часовник, како и музика. Но блутут конекција значи дека и телефонот треба да ви е во близина, а јас секако не трчам со телефон, а ако телефонот ми е во близина, тогаш ќе го користам телефонот, нема да проверува пораки на часовникот, па од тие причини не се ни обидов да се замарам и да ги конектирам. Ама за некои рекреативни тркачи ова може да е интересна и практична работа.garmin macedonia

Единствено што можам да си посакам со новиов Гармин е да ми потрае доволно долго колку и неговиот претходник и да ми прави друштво на уште многу тренинзи, трки и да ми биде сведок на уште соборени рекорди и освоени шампионски титули, или да го замени поскоро некој понов и поубав модел. Сега за сега сум апсолутно задоволна и крајно благодарна на Гармин Македонија за искажаната доверба. Ретки се таквите спортски фанатици кои ги почитуваат домашните атлетичари и спортисти, а без притоа да бараат ништо за возврат освен да продолжиме да си ги бркаме соништата кон поголеми спортски успеси! Илјда пати благодарам!!!

П.С. и да не заборавам да ве потсетам дека сеуште важи понудата за сите тркачи дека со секој купен Гармин часовник, ја добивате нашата книга “Издржи, кралице“ гратис!

(*Гармин Македонија е официјален дистрибутер за Гармин во Македонија и преку нив може да ги добиете наjдобрите понуди на сите часовници, по најповолни цени во земјата)

Permalink