За ЗАДОВОЛНИТЕ клубови во АФМ

Немав апсолутно никаква намера ниту волја да пишувам ништо за ова, сакав да тргнам сѐ на страна и да ги оставам задоволните од моменталната поставеност на АФМ среќни.

Ама ете денес излезе едно интевју на една девојка од тимот на овие што ги споменав како “задоволните од поставеноста на АФМ“ како наводно сега (едвај 24 часа подоцна) е незадоволна и ме извади од контакт.

            Ама има нови и помалку упатени за ситуацијата, па да почнам со ред, да ве воведам во глупавштината која го достигна врвот и сериозно ова е последно да пишувам или на било кој друг начин да се/ве замарам и оптеретувам со сѐ што се случува во АФМ и ЗАДОВОЛНИТЕ клубови.

            Всушност, уште лани планирав да го направам ова, да се тргнам од сѐ, имавме доста тешка година на личен, семеен план и немав повеќе мотивација ни амбиција да удирам со глава во ѕид. Кога Кире Синадиновски ми јави дека имаме сериозен кандидат, амбициозен човек кој може конечно да помогне да донесеме свежина во АФМ, Иван Цветкоски од Охрид (Охрид ТрчаТ). Со последни сили отидов да го ислушам на состанокот и навистина човек со визија, истомисленик до коска. ОК, договараме следен состанок со цела екипа на атлетски клубови со кои, барем до тој момент сметавме дека имаме доверба и сме истомисленици. Испадна што испадна, диктаторската постава на Собранието лани не ни дозволи да изгласаме недоверба, ниту да стигнеме до точка за гласање, си отиде. ОК. Стигнавме пак до истата точка оваа, 2018 година, вчера (16.дек.) на годишно Собрание.

            До вчера бевме единаесет клубови кои имавме ист став дека ќе гласаме за недоверба на Претседателот на АФМ и неговите соработници. Од дваесет присутни клубови, тоа значеше длабоко надгласување. Што се случи?

            Да бидам искрена и јас уште си мавам глава во неверување. Едниот клуб кој не продаде не сум го ни сметала за активен, но АК Делта, некој да ми кажуваше дека ќе не продадат како Јуда немаше да му верувам. Иако не им е прв пат, ова им се има случено на сите нивни членови/атлетичари по триести пат. Ама по карактер сум таква да им давам шанса на луѓето, во надеж дека се промениле. Ама за тие од Делта, после триести пат забодување нож во грб, си реков сама на себе, абе не им давам пак шанса, ги отпишав сите од секаде, ниту на здраво не бев, ги одминував како промаја, да не зборувам за блокирање на социјални мрежи.

            И ете помина време и јас пак по старо, пак им давам шанса, пак верувам лицемерите ќе се сменат. Не се менуваат, слушајте ми го советот, ако јас не си го слушам својот, кој еднаш ве за*бал, пак ќе ве за*бе.

            Ме предомисли реакцијата на членовите на Делта после импровизираните подготовки на Водно и скандалот кој го јадеше сениоркиот тим (вклучително членовите на Делта) по вина на АФМ, селектор, претседател, секретар… Да не се навраќам има тука текст да се потсетите. Тогаш членовите на Делта изразија такво незадоволство кон овие ликови што јас и мојот тим Индјуренс едвај сме покажале. Тогаш си реков и на Делта конечно им дојде памет, овој пат сфатија за што се буневме ние со години. И додека се креваше Хотел Водно во воздух во тие час-два во дискусија и дебата на тема АФМ, еден од келнерите не слушаше и на крајот кога се стишивме рече нешто што уште ми зуе во главата: “Абе џабе вие тука се правите силни, кога ќе се симнете доле и ќе дојде време да гласате пак ќе терате по старо“. Јас само се свртев и го погледнав и само што не заплакав зашто потсвесно знаев уште тогаш дека е во право, само му реков, “чичко, да знаеш дека имаш право, секогаш е така.“

Ама надежда последна умира. Пак се состанавме и до последно овие единаесет клуба колку што и ни се потребни за мнозинство беа за промени во структурите на АФМ, сите подеднакво незадоволни од раководството. И пак се прашувам, како и вие, што се случи?

Делта, што ви ветија толку за да се продадете? Само што влеговме ете ти ги тие нивните делегати си кренаа рака каде се изјаснуваат дека се задоволни од раководството, на прашањето: Дали сте за изгласување недоверба кон актуелното претседателство? Само девет клуба бевме ЗА! Шамар! Нож во грб! Ножеви! Не ми се веруваше што се случи? Кој кого изигра тука? Дали ние нешто не сфативме?

Во апсолутно неверување го напуштивме собранието. За што нѐ продадовте? Самите себе си за што се продадовте? Ако сериозно барем имате личен интерес, па да речам ОК. Ама еве денес гледам од вашата атлетичарка како изјавува пак дека е незадоволна од претседателството. Кој кого лаже тука? Па вчера, само што кренавте црвено знаменце, ти девојко и твојот клуб веќе денес се предомисливте? Кога пред пет-шест години јас како актуелна рекордерка со десетина рекорди и кој знае колку шампионски титули ве молев да ме поддржите мене и мојот клуб, дека и вие еден ден ќе дојдете на мое место и ќе ви биде криво, вие си свиркавте, се правевте паметни, мудро си молчевте, ми фаќавте сеир, ми се смеевте? Ни се смеевте и вчера на собрание? Зашто денес се буниш ма девојко? Вие од Делта зашто денес се буните? Каде бевте бре вчера да кренете знаменце? Па како ќе ме погледнете утре во очи сите вие предавници? Како ќе го погледнете Кире во очи кога ќе сакате да трчате на маратон кај него? Како ќе го погледнете Иван во очи утре кога ќе сакате да трчате кај него во Охрид? Како ќе поминете покрај Кристијан и Рахман на стадион? Со која доблест?

И да не се правиме повеќе мутави дека вие сте “само“ атлетичари и ништо не сте знаеле за ова! Сите сѐ знаете многу добро, сите сте возрасни полнолетни со по 20-30-40 години. И јас бев атлетичарка и тоа со само 15-16 години во клубови кои не работеа во мој интерес и не гласаа на собранија во интерес на атлетичарите, па затоа си дадов исписница од тие два клуба, а сум била дете. Што е вашиот изговор за инертност? Зашто не ве гледам да се дистанцирате и да ги напуштате клубовите со кои не се согласувате. Очигледно се согласувате со нивниот став, никој повеќе не е мутав, сите сѐ знаете, така ви чини.

Затоа ве молам, следен пат кога ќе се видиме, не ме поздравувајте, на пиедестал каде најверојатно пак ќе делиме, не ми честитајте, не очекувајте да ви честитам, држете ја главата наведната и ќутете си и понатаму со оглед на тоа што вчера сите изгласавте дека сте апсолутно задоволни од актуелното претседателство и не ширете невистини по медиуми дека сте незадоволни. Или координирајте си се внатре во тимот.

На крајот од денот, веројатно не сум ни лута на нив, најмалку на претседателството на АФМ, но највеќе на себе си, што сама си прегазив преку своите ветувања дека нема повеќе да се доведувам во ваква ситуација каде ќе бидам изиграна по стоти пат од истите луѓе, дека нема пак да си давам високи очекување и надежи и ете ме пак, на истиот почеток.

Permalink