Патиките не трчаат сами. Или трчаат?

Кога го напишав постот насловен како “Уште еден пар патики“ пред некои седум-осум месеци, мислев дека кажав сé што имав да кажам на темата и дека ќе бидам разбрана кога напишав дека патиките сами не трчаат, дека ја затворив темата – што повеќе да ви кажам и како да ви кажам за да ме разберете.

Но, некој месец подоцна, во октомври минатата година, Кипчоге го спушти маратонот под два часа на неофицијална трка и тоа не е рекорд, но сепак отвори дискусија на тема патиките што ги носеше. И за да темата на дискусија стане уште поатрактивна, ден подоцна беше соборен и женскиот рекорд во маратон во истите патики.

Нормално дека брендот си зема замав и ја искористи оваа прилика да потенцира дека ова е резултат на нивните патики. И затоа што потрошувачката маса слепо му верува на брендот со штикла, сите наеднаш почнаа да зборуваат како патиките се супер појачани и дека навистина “сами трчаат“. Кој и да ги облече, прави рекорди. До патиките е, нема што. Јас бев крајно изненадена од реакциите дури кога еден близок атлетски пријател кој никогаш, никогаш не би очекувала, и е претпоследен (јас последна) од кого би очекувала да рече “па значи до патиките е“. Кога ова го чув од него, се откажав од тркачкото општество, заслужувате да ве манипулираат. Значи не ве лажат, никој никогаш не ви рече дека патиките сами трчаат, ама така умешно манипулираат што безмалку сите поверуваа. И уште веруваат.

И оп, наеднаш Кипчоге се најде навреден. Тој кој така умешно обучен да ја исфилува приказната, чесен човек, кој немаше ни најмала намера во тоа, не покажувам со прст кон него, ама и мене да ме плаќаат и доживотно да сум обезбедена, ќе го кажев истото, дека патиките се супер и дека без нив не би била сигурна дали би истрчала маратон под два часа. Кипчоге се најде навреден од тоа како наеднаш светската јавност заслугата ја префрла на патиките, а не на неговата макотрпна работа. Удрен со свој камен по глава, вели една наша народна. Повторно, ништо никој не излажа. Убаво си кажа, ама она што луѓето лесни за манипулација разбираат од сето ова, е дека под два часа истрчал поради патиките. Точка. Нормално дека Кипчоге се најде навреден, наеднаш сите испаѓа дека му го ставаат трудот под чергичка и сите веруаат во неговата приказна, дека патиките сами трчаат. Се шокираа сите, запрепастени како наеднаш цел свет им поверува на манипуацијата. И сега што правиме. И почна да дава срцепарателни изјави како “патиките сами не трчаат“. Кипчоге, срцепарателни приказни се моја бранша, не му проповедај на црковниот хор, јас го напишав тоа 8 месеци пред тебе, не препишувај, ок.

Шега на страна, наеднаш, брендот и атлетчариве кои го застапуваат брендот, удрените со свој камен по глава се најдоа во замка. Нормално дека и нивните конкуренти (атлетичари и спортски брендови) не пијат нафта, па и тие тераат бизнис, а успешен бизнис е успешен само ако успееш да ја изманипулираш масата. Не да ја излажеш, туку да ја изманипулираш, за да нема за што да ти се фатат ако почнат да покажуваат со прст. Повторно, никој никого не излажа, никој не рече дека патиките сами трчаат.

Во прилог, една постара реклама на истиов бред, каде кошаркарската легенда Мајкл Џордан и неговиот застапник, истиов бренд ги ракламираат патиките и во истата реклама од само 30 секунди тој 8 пати изјавува дека патиките НЕ го прават подобар кошаркар, но во исто време сите ги сакаат “Џорданиките“ кои и ден денес се едни од најпродаваните. Иако тие изречито велат дека патиките НЕ трчаат сами, масата сé што слуша е она што сака да го чуе, како полесно да дојде до посакуваниот резултат, без да се замори и испоти. Погледнете:

Но, затоа што овие од спротивниот табор се исто толку умешни манипулатори во овој суров бизнис, им го вратија каменот назад. Ок. Патиките сами трчаат. Тогаш зошто само одредени тркачи ги уживаат бенефитите да  трчаат во нив? Од каде знаете дека доколку и јас немам пристап и не ме спонзорира брендот со иста таква опрема, дека можеби и јас нема да истрчам светски рекорд или државен во најмала рака? Јас трчам со опрема и патики што ги купив во оној аутлетот на распродажбата во Расадник, некои модели од 2009-10, за 990 денари. Можеби затоа сум толку спора? Што доколку овие патики кои се прототип достапен само за една ограничена бројка елитни тркачи е навистина механички допинг? Можеби имаат отскочна моќ и за секој втор чекор кој го правам јас, тие овозможуваат еден нивен? Тоа е дупла заштеда на енергија, а дупла заштеда на енергија, значи дупло пократко време, нели?

Технологијата брзо напредува, а со тоа и апетитите на брендовите да воведат што поголема и поефикасна новина во секое поле, вклучително и спортот, вклучително и атлетиката, особено маратонското трчање. Нормално е атлетската фела да биде загрижена за тоа во која насока оди сето тоа и што доколку технологијата стигне на ниво следните модели да имаат вградено федери или електронски тркалца во нив? Каде и кога ќе се повлече граница.

Неодамна, Светска Атлетика (World Athletics) излезе со нов правилник со нови рамки во кои смее да се движи употребата на патики (и спринтерки). Воглавно, регулативите се насочени кон самите брендови кои работат во произвотство и дистрибуција, но нормално и на самите атлетичари/ки. Сите патики/спринтерки кои ќе ги користат атлетичарите мора да бидат достапни на отворениот пазар (во продавници или онлајн) во период од минимум четири месеци пред да смее да се користи на натпревар. Доколку патиките не се отворено достапни за сите, тогаш ќе се сметаат за прототип и натпреварување во истите нема да биде дозволено. Патиките мора да исполнат одредени критериуми (наведени на линкот во прилог погоре, а повеќе наменети за производителите на патики). Овие правила генерално се однесуваат за атлетичарите/ките (елитните тркачи) кои се борат за врвните позиции на првенствата и натпреварите и чии резултати се вклучени во борбата за рекорди и титули.

Пресек на патиките, каде јасно се гледа составот на патиката, не премногу поразличен од секоја друга, само ниво полесни и покомотни, без федери или други механизми кои би стимулирале поголема ефикасност, освен што го олеснуваат трчањето во нив, но не и стимулираат:

Како и до сега, така и понатаму, јас нормално дека не верувам дека патиките сами трчаат, дека јас би направила светски рекорд ако трчам во истите или дека можеби ќе можам да си дозволам да ги купам ако излезат на пазарот во рамките на тие четири месеци пред натпреварот, за да не бидат прототип и да се достапни за сите. Глупости. не сум јас тука со намера да ве манипулирам, туку напротив, да ви ја кажам и укажам играта на зборови која ја користат брендовите. Доколку брендов беше мој спонзор кој ќе ме обезбеди доживотно, мојата статија сега ќе беше следнава: “супер лесни патики кои ми овозможуваат подобар перформанс, лесен чекор и поголем фокус на трката наместо на тоа дали патиките ми прават плускавци после 30ти километар. Иако мојот труд и макотрпна работа се клучни за моите високи перформанси.“ Гледате, чисто и јасно, никаде не излажав, ниту ви кажав дека треба и вие да одите да ги купите за да имате резулатати како моите. Но, се што вие прочитавте и знаете за мене, е дека Весна е шесткратна шампионка на Македонија во маратон и поранешна рекордерка со 3:07 резултат, ако таа трчала и победувала во тие патики, нормално дека ќе ги носам и јас.

Кипчоге ќе истрчаше под 2 маратон дури и ако ги носеше моиве патики од 990мкд. тој ден затоа што беше спремен. Она што ми е поентата на овој пост е да не паѓате на секоја глупост која ќе ја прочитате. Маратонското трчање е во сè поголем пораст и рекреативната маса сè поголема, но лесна за манипулација токму поради тоа што се новајлии во оваа област и неискуството и желбата да се докажат пред останатите, во најнов модел на светкави, дречливи патики со желба да се биде виден, почитуван, истакнат и да се вклопи во масата, токму тоа ја прави оваа таргет група лесна за манипулација.

Дваесет и две години сум во овој спорт и секој пат кога ќе застанам до некој рекреативец, се чувствувам како шарлатан, секој од нив знае повеќе за патиките од мене, секој го знае моделот и бројот на памет, го знае и тој пред него и тој пред него само кога ќе ја види патиката. Знае и кој е следен модел кој ќе излезе следната сезона и во кои бои и нијанси. Најискрено, појма немам ниту ме интересира моделот на патиките кои моментално ги носам, можеби само брендот да го забележам, ама толку. Во продавница одам, го гледам најевтиниот модел кој ќе ми фати око и го пробувам да видам како лежи на нога. Ако лежи супер, го земам, ако не, одам на следниот најевтин модел и така додека не го најдам вистинскиот. Толку од моите стручни совети за тоа која патика е најдобра за трчање.

И над се, уживајте во трчањето, особено вие рекреативците, не заборавајте зошто сте тука и зошто почнавте да тренирате, не дозволувајте да бидете вовлечени во центрифугата на докажување кој има подобри патики, шорцеви, кој истрчал највеќе интернационални маратони, кој ослабел 20кг за 6 месеци, кој истрчал под 4 часа маратон. Искрено, никого не го интересира, дури ни тие 200 души што ќе ви стават лајк од куртоазија, за да не мислите дека ве мразат. А ви го кажувам ова од искуство, бидејќи никого не го интересираше кој е мојот државен рекорд, а никого не го интересира ни актуелниот. Затоа, уживајте во трчањето и дружбата на маратонските фестивали, се друго е минливо, особено најновиот модел патики, кои за година дена од сега ќе бидат стар модел во аутлет за 990 денари.

 

Permalink